Katholik pawlpi dinga diocese lienpen khat a Pu Archbishop in mailam hun lam-et a pawlpi in vocation atam nei nadingin ngetna anei hi.
April 28 nia amasapen dinga State of the Archdiocese Address Cebu Metropolitan Cathedral, central Philippines a thugenna aneina ah Archbishop Alberto Uy in archdiocese sunga tu-leh-tua diocesan siempu 386 umteng akiching nalai a himananleh pastoral nasepna te a gam akibelap tungtawn in a hamsa deudeu hi achi hi.
Tam siempute’n parish 170 a enkawl ua, tualeh tam parish te ah pawlpimi million 4.6 a um hi. Hitamaleh tam siempute hi se 10 suo se 6 hi kum 50 tunglam ahita ua tualeh se 3 suo se 1 te hi atawmpen in kum 60 ahita uhi. Siempute hi a upa mama ta uhi.
CBCP thusuo te thuphuon dungzui in, “Siempu khangdawng hi atawm nalai mama hi,” chi’n Uy in agen hi. “Tu-leh-tu’n Pasian nasepna hi hoitah in akibawl nalai a hitamaleh siempu upa te kungah iki ngaseng mama uhi, amaute hi atha uh ang kiem tading hi mailam hun ah.”
Pu Archbishop in mailam kum 8 sungin tam siempute hi atamzaw retire ding ahita ua anasepte ujong atam tasih ding hi, tam jieh in siempu iki tasam ding uhi. “Tami hi sietna ahisih a, ahi’n tua ikisahkhawl nading ua chielna ahi,” achi hi, CBCP thusuo dungzui in.
Uy in pawlpi khantou nadinga vocation promotion habawl ding, siempu sinte khausah ding tualeh pawlpi mite biehna leh pawlpi nasepnate a panmun tam pieh dingin ngetna anei hi. Tu-leh-tu’n archdiocese sungah siempu sin 225 a um a tamte hi a formation vaiguol te hi Vatican toh akizawp hi chi’n CBCP thusuo in agiel hi.
Vocation tamthei nadingin sanginn, khangnoute kipawlkhawm nate tualeh parish te toh kikhutzawp in pan nasatah in akila hi. “Ki ningkoina toh vocation khang ahisih a, kipawlkhawm a thu ingetkhawm a iki panpi tuo tualeh i zawkhawm nate pan ahijo hi,” achi hi CBCP thusuo in agen dan in.
Uy injong siempute panpina dinga pan lah ding tamte lah a zatou innte a manbei a kizen theinate talahna zong aneia tualeh nasem mite dinga dihtah a panmun piehna leh compensation pieh ding zong atalah hi chi’n CBCP thusuo in agen hi.
