Canonization Cause-in ma asawn jiehin Malaysia Katholikte Sybil Kathigasu zatatna pedingin kikhawm uh
Malaysian Katholikte June 6 ni’n Penang Diocese-a Church of St. Michael-ah ana kikhawm ua, gaal laia mi hangsan Sybil Kathigasu Catholic Church-in beatification leh canonization dinga aguon lai in zatatna hun amang uhi.
A shi kalsie kum 78 achinna hun kiman na ah thungente, ahaan a peite, theizingna Mass te leh Brigadier General Fitzgerald Augustin (Retired) in “I Will Pay the Supreme Sacrifice My Lord, I Promise This in Thy Name” chi thupi zangin presentation anei hi.
Presentation ah nurse leh minu Kathigasu hinkhuo tangthu atalat hi. Gaalpi II laia Malaysia gam Japante in ana luo dinga akisah lai un Japante doudal a panmun nasatah ana lahna te tungtawn in tuni tan in agam sung uah mi minthang mama khat ahi nalai hi.
Apien in Sybil Daly chi’n ana kiminvaw a, atenna inn Papan pan in Allied gaal kapte ana panpi a, Japante dou a gaal kapte zatui zaha ana pie a ana kem hi. Tami asil bawlte jieh in Kempeitai military police te’n amanu ana man uhi.
Genthei taha hunsawtpi akisawisah leh thu akidoh jou in zong ami panpite agen nuom sih hi. Gaal laia a genthei hasatna thuohte “No Dram of Mercy” chi’n laibu ah ang kigiel lut a, Tami laibu in genthei thuohdan leh ginna dettah neidan a ensah hi.
A thawng kiet laia liemna ana thuohte’n tahsa damlouna hunsawtpi ana neisah hi. Amanu hinkhuo sunga ilungsim khoikha mama tangthu khat gaal jouin apieng hi, spinal injury nasatah ana neia, “Batu Gajah a St. Joseph biehinn ah ei zong unlen akotlam ah ei nuasie un, tuanapat in kabawh vah dinga siengthou pumpi maiah thu kangen ding hi”, achi hi.
Katholik mitampi dingin genthei hasatna leh nat leh sat thuoh komkal a ginna dettah neidan tualeh thuohatdan a ensah hi.
June 6 nia tami vaiguon a telte’n Kathigasu ahaan ah zana ana pie uhi. Penang Bishop Cardinal Sebastian Francis in ahaanmual ave jou in theizingna Mass abawl hi.
Cardinal Sebastian in hunpi a athugenna ah Timothy kunga Misiengthou Paul thugen angaituoh kia a, "Tai kidemna atawp tan katai tahi. Ginna ka kem zing hi. Kapei hun ahita hi," achi hi.
Tami kamtengte hi misiengthou Paul kung maimai a zahthei ahisih a Sybil Kathigasu kungah zong zahthei ahi tualeh khat leh khat kunga zong zahthei ahiei chi ngaisut un chi’n mipite kungah chielna anei hi.
Cardinal Sebastian Kathigasu hi te-chi khat ahi chi’n agen a, amanu hinkhuo i et-te na chiengin sakhuo, nam leh tawndante gamgi apel hi.
Malaysia gama Katholik pawlpi in a siengthouna theipina lampiah masawnna poimaw tah anei a, July 1, 2024 ni’n Cardinal Sebastian in beatification leh canonization adinga asil tup masawnna khu formal tah in a phuong hi.
Gaal lai in ana suota tamaleh athawng kiet laia ana liemnate pan in ahin sungin adam thei tahtah nonsih hi. Britain-ah ki etsah nading zatou sui in azin a, June 12, 1948 in Scotland khopi Lanarkshire ah kum 49 ahi in ana shi hi.
Nuasang in aluong Malay-ah aki puo kia a, Ipoh-a St. Michael’s biehinn ah akivui hi. Tuni tan in a haan hi Katholik pawlpi mi hitaleh pawl dang dangte leh amanu ngaisang leh atangthu in ahanthawn te dingin zong zinna siengthou mun khat ahi nalai hi.
Malaysia Katholik mitam tah dingin Kathigasu in gaal laia gaalhang ahina sang in sildan a ensah jo hi. Numei, kibawlsietna neia ginna dettah neimi ahina. Tami pan in gingtute tampi ahanthawn a hangsan tah ginna dettah toh Pasian toh akinai sah hi.
Cardinal Sebastian Francis personal assistant Christopher Kushy in Radio Veritas Asia a hildan in, "Sybil hinkhuo in ginna a kiphungvua hangsanna in akhang adinga mutzin nasiepen nasan zong athuoh thaw ding hi,” achi hi.
A shi nua kum sawmgiet achin nading nai tama leh, tuni tan in Malaysian Catholic khangthu adingin amanu tangthu hi tangthu thupi pen khat ahi nalai hi.
Translated by: William Zo
