2025 Kum in Vatican Khuopi leh gam dangte bang chibangin ahing kikawm ding uoiI?
2025 KUM IN VATICAN KHUOPI LEH GAM DANGTE BANG CHIBANGIN AHING KIKAWM DING UOI?
Tu leh tu in Vatican Khuopi leh gam dang 180 akikawm ua, tukum 2025 in gam bangza toh akikawm diei gen thei umsih, adiehdieh in Muslim gamte toh. Gam Dang toh Kikawmna (Diplomacy) pen Vatican in ana nei zing gige ahia, China gam nasan toh kikawmna ana nei gige hi. Muslim gam tuomtuom in Katholik Pawlpi mite ahel bawl ua, phasa khat apaupui ua, phasa khat ei tha pieh uhi. Tambanga gamta gamte toh kikawm nading hamsa mama.
Vatican Khuopi hi bangza tah in neu tama lezong, leitunga gam khat ahia, gam dangte toh akikawm gige a, gam liente mabangin Vatican min in Ambassador (Nuncio) kichi bishop ahisihleh archbishop khat kikawmpite gam ah atou ua, tualeh kikawmpi gamdang mite ambassador zong Vatican ah atou uhi.
Ambassadorte (gam tanga a pangte) bawl leh sep ding bangzapi umsih lezong, gamdangte tanga Vatican a toute'n Pope akimupi jel ua, tualeh Nunciote (Vatican tanga panmun luote) inzong tua kikawmpi gam lamkaite akimupi jel uhi. Nei leh lam langah Vatican in pieh ding neisih lezong, Pope in kikawmpite gam apha jel a, kilemna thu leh kisuhhalna thu agen jel a, akingai nuom mama hi.
