NICHIN THUMNA PUITU By Rev. Awnkhankhup
October 14 (Ziltawpni)
JESU MAW BARABA?
Tuachiin amaute a hing kikhop tah un, Pilat in a kung uah, ‘Koizaw hing hadoh leng na ut uoi? Baraba ahiei ahisihleh Jesu Khrist kichipa?’ a chi hi (Mat. 27:17)
Judate Jesu kung a hing pei in, ama Pilat kung ah a heh uhi. Hinanleh Pilat in Jesu khelna a mukhe zousih hi. Hapta khat zong pei nailou a, Jerusalem a loupitah a sabiltungnou tung a tuong a a lut lai a, Hossana kisam gingte toh sil umdan a hing kilumletta mama hi. Ama pahtawi a kikoute mama in, mi gilou leh tuolthat Baraba hakhie a, khelna neilou Jesu khailia ding in a hing kikoukheta mai uhi. Tuni hun in eiten, koi i gum in, koi i mawsah uoi? Baraba maw Jesu? Silhoilou i bawl ut chieng a Jesu dongkhol sa in, kitheimawbawl zel mai i hileh vang, ama sang a bang ama khat tel zaw i hi ding a, Jesu khailia ding a pekhie i suoh zel kha ding uhi. Deizawh tel hun ahi.
