Tutantan in Lourdes a Tonu Mari in mi tamtah damna pie
Apeisa 1858 kum in France gam ah sil lamdang khat ana pieng hi. Tana sil lamdang pien hun ahileh, phalbi laitah ahi sese a, ani ahileh February 11, akum ahileh 1858 kum ahia, tami ni in Tonu Mari, kum 14 a upa numei naupang khat kungah ana kilah hi. Tana naupangnu kungah Nu Mari in gen nuom khat anei hi: leitung mite’n a Tapa Jesu kinaipi kialeh leitung in hundamna anga ding hi chi’n tamnu kungah ana kilah hi.
Tua kum a kipan in France gam ah Tonu Mari kunga thunget ahing tuoi kia a, gamdanga Katholik pawlpi mite zong France ah Mari kunga thungen dingin ahing kuon uhi. Akum akum in February 11 ni’n Lourdes a Tonu Mari Pawi (Feast of Our Lady of Lourdes) akilawm hi. Kum khat sungah atawm pen mi 6,000,000 (million guh) vel Lourdes ah azin ua, Tonu Mari kungah thu angen uhi tualeh mi tamtah in adamlaw uhi. Tana thungen dinga hing kuonte ahileh, Katholik pawlpi mi guoh ahisih ua, Khristien pawlpi tuomtuomte zong ahing zin ua, phasa khat, Tonu Mari kunga thu anget jo un, Katholik pawlpi ah ahing lut uhi. Tam zong sil lamdang mama khat in akithei hi.
Ngahnu pan Lie Bernadette Soubirou in Tonu Mari 18 vei ana mu a, Tonu Mari khu ngahnu khangdawng, melhoi mama khat in ana mu gige hi. Bernadette kunga akilah laitah in, Nu Mari in tam mun ah biehinn khat lam un achia, na bishoppa kungah va gen in achi hi.
Tonu Mari pen Bernadette in agal mu ahia, suongkuo (grotto) tungah amu a, tua pan Bernadette a hopi hi. Suongkuo nei lam na khut toh khuot lachin tuisam ahing puul ding hi chi’n Mari in Bernadette ahil a, tuisam khat ahing puuldoh pai ngal hi. Tua tui khu dawn in achi hi.
Akilah laitah in Tonu Mari in “Kei mawna neiloh a pieng nu kahi” (I am the Immaculate Conception) achi hi.
Tu-le-tu inzong Lourdes a thungen dingin mi khuovaitung abang nalai a, kum 164 jo inzong mi adim zing nalai hi. Tanah, Siengtho Pumpi (Blessed Sacrament) toh mi chinate thupha akipie a, mi tamtah in adamlaw uhi. Mawnei mi, kisiana nei ngailoh, mawphel ngailoh, biehinn kai ngailoh tamtah in tam mun ah pienthana atang gige uhi. Hichi’n Tonu Mari in Lourdes ah sil lamdang abawl nalaia, Pasian gingtaloh mi tamtah in pienthana atang uhi
