LUKE 13: 10-17
Khawlni a numei adamsahna
Tuachin Aman khawlni in kikhopna inn khat ah thu ahil hi. Tuamun ah kum sawmlegiet dawi mat a damlou numei khat aum a; amanu angum akuul a, adingtang thei sih hi. Tuachin Jesu’n amanu amubep in ahaan a akungah, “Numei, na damlounate apat in nadamta hi,” achi hi. Aman tua numeinu tungah akhut angap laitah in thakhat in ahing dingtangta a, tuamin Pasian apahtawita hi. Hinanleh khawlni a Jesu’n mi asuhdam jieh in kikhopna inn a lamkaipa alungthah a, khuchin mipite ahoupi a akung uah, “Khawl ni chilou kisuhdam nading ni guh sung aum a, tuami sungin hingpei inlen kisudam tavete,” achi a. Tua bepin Topan amau adawng a akung uah, “Nou mi lepchiete aw, khawlni in na bawng amah ahisihleh na sabiltung uh amah a kikhina apat in na suut khie ua, tuidawn dingin na pui uh hilou amah? Tam numeinu Abraham tanu ahia, en ve uo, Setan in kum sawmlegiet sung ana man a khawlni a Setan in tambanga akaan na suutpiehlou a umthei ding ihi uh amah?” achi hi. Tua chia aman tami thute agenbep in ameelmate jousie a zumgawp ua, hinanleh mipite khu Aman sillamdang abawl jieh in akipah uhi.
