LUKE 13: 1-9
Akisialoute mangthang ding
Tua hunlai in Pilat in Galili mite atha a asisan uh Pasian biehna sa toh a halkhawm thu akung ua hing hil mi hunkhop khat aum uhi. Khumin aman adawnga akung uah, “Galili gam a miten hichibang sil athuoh jieh ua Galili midang jousie sanga gilouzaw ding un nangaisun uh amah? Hilou e, kahing hil nahi uhi, nou zong na kisia sih uleh tua bangin na mangthang ding uhi. Ahisihleh, Siloam innsaang in apuakhum a anetlia mi sawmlegiette khu Jerusalem khuo aumte saanga gilouzaw hi ding un na ngaisun uh amah? Hilou e, kahing hil nahi uhi, amabou nouten zong kisiana na neisih uleh hichibangin na mangthang ding uhi,” achi hi.
Theipikung galou gentena
Aman hichibang gentena thu agen a: “Mi khat in a leengga huon sungah theipikung khat anei a, aga ava suileh khatbeh zong amusih hi. Tuamin aman leengga huon keempa kungah, ‘En vawi, kum thum sunga tami theipiga ka sui leh, khatbeh zong ka musih a phua mai in, bangchidan a gam chinteng adeep e?’achi hi. Tuabep in aman akungah,‘Pu aw, tukum sung hichisah tadi inlen, a kiimkot in lei tou vang in, leihoi toh aphung kavua ding hi. Khuchia kumkia chienga ahing ga le lah ahoi hivan in, hinanleh ahing ga tuomlou leh phua mai tan,” achi hi.
