N I T E N G H A T N A
January 30, 2025 (Ningani)
THUPI: EIMAH HOIHSAK BANGA OM
Taangteel: Huai hun lai in Israel ah kumpipa a om kei a, michih amau' utdan dan in a gamta mai uhi ( Vai 21:25).
Hiai thu abu tawp lam tak ah om mahleh vaihawmte bu sunga thil omte ziak genna ahi. Vaihawmte leh thunei lianpen kuamah om tuanlou a, mahni hoihsak bang chiat a om, hoih leh nuam dingin i gingta maithei ua, ana huchi khollou ahi chih vaihawmte hun in a hon hilh hi. Vaihawmte hun tuh hun haksa leh vuallelhna hun ahi. Aziak tuh michih amau utdan leh hoihsak dan banga zela om a, ki thuman khuk omlou a om man uh ahi. Innkuan sung ah, kho sung ah, saptuam sung leh gamsung ah vaihawmtu a om a, huai thuthu a i kimakaih ding uh ahi.
Thumna: Toupa kei hoihsak kia hilou a, vaihawmte thu zui a om thei chiat dingin pilna hon pia in, Toupa Jesu minin kon ngen hi. Amen.
