MI NGAIDAM THEIHO POHGIH AJANGE
September 13 nikho alhunseh le athah beh in kum 1993 laiya kho 360 meiya eikihal lhah peh-uva, mihem 1000 val thatna chule mihem 100,000 val galjama um sah ho akigel doh jin mitampi igenthei nau athah beh in lunga alang kitjin ahi. Chutobang nikho laiya hahsatna toh (victim) jousen gal'a eibol hou ngaidama Pathen koma taopeh thei lou idimset nah lai diu tahsan aume.
Hinla chu nikho geldoh a pohgih poh poh jenghi eithat hou sanga eiho kivangsejo ding ahijeh in eithat hou geiya ngaidam goh hilouva taopeh theiya ium diu hi hamphatna joh hidin kagel e. Pathenin, Phulah chu kei kin ahi atijeh in athah beh in Pathen nganseu hitin Christian khat din, Ngaidam kithem chuh-u hite.
Covid-19 lockdown jeh in, Jingkahseh Devotion kahin jih in mi tampin kipa thu jong ahin seiyun, hiche lah a chun pasal khat in, "July 31, 2020 nia nathu sim jih, 'LUNGNATNA POHGIH THINLHAH THEMDI' ti kasim doh chun nasa tah in kalung atong khan ahi. Mikhat kaplih a eijong kitha ding geiya ana kigellha kahin, nathu sim jih in eina tuhtang kha hih le Tahsa hihen Lhagao hijongle kamanthah ding anahi. Hiche thusim chun komtong sunga um sangan bangin eina huh doh e" tin eihin thot in kasim doh chun seijou louvin Pathen kathangvah in ahi.
Tujinga isei nomu chu, mihem dinga ngaidam ding hahsa tah mi umjongle Pathen Lhagaovin eipanpiu le ngaidam jouna lungthim akinei theiye tihi ahi. Pathen Lhagaovin nahoupi teng nahsah louvin koi hih in hichu nang dinga thilpha joh ahiye. Asei nabol le ngaidam lel hel pohgih hinkho lhum keiya napoh ding geiya jong nakup lhah sah thei ahi.
Dr. S. Chongloi
