Synodality in Asia gam azung kai nading khu, pastoral malahna dang banga kipawm lou a Pawlpi hindan, a ngaikhiet dan leh a mission peipi dan sulamdang banga aki pawm jou chiengin ahi pan ding hi.
Tuami khu Associate Secretary of the Federation of Asian Bishops' Conferences (FABC) leh Executive Secretary of the FABC Office of Synodality Fr. Clarence Devadass in July 24 a Hotel Mulia, Jakarta a Leatris Media Room a XII FABC Plenary Assembly a press conference aniveina a athugen gil pen ahi.
Fr. Devadass in Cardinal Mario Grech, Cardinal Pablo Virgilio S. David leh Cardinal Ignatius Suharyo te’n journalist te thu agen masangin a thumakai thugen zangin thubuoi peipi ding dan ma ahong hi. Synod on Synodality khu a peipi dan dinga akilut laitah ahi thu atheisah kia a, tua khu tuolsung Pawlpi chinte Synodality hun bangtan khat tan adinga project banga ngai sanga hindan ngaina banga tel dinga hatna hun ahi achi hi.
Asia gamkai a Pawlpi in hasatna atuohte ngaituo in Fr. Devadass in a daltu lian penkhat khu synodality pastoral calendar buoi tah sunga pungsah vaiguon kibelap sahna ngaidan lienpi neina khu ahi thu agen hi.
Fr. Devadass in khovel a gamkai lien pen leh tawndan tuom tuom a um Asia gam pumpi a synodality peipi dinga hasatna deu te a tahlang hi.
"Synodality" chi thumal tuolsung ham te a le ding jong a hasa thei hi chi agen hi.
Asia gam ah culture, linguistic, leh social diversity a um jiehin, apeipi ding dan lampi khat maimai a umthei sih hi chi’n agen kia hi.
"Asia gam a Pawlpite hasatna jousie sufel theiding solution khatjong a umsih hi," chi’n agen chien hi. "Tuolsung Pawlpi chin in amau context sungah synodality hi bang chi bang ahi e chi atheisiem ding uh ahi."
Fr. Devadass adingin, buoina thuuh zaw khu ham leh pau hilou in hagau lam sil ahi.
Tuabang kisiem thana in Pawlpi tawndan lui te apeisan hilou in, tulai khovel ah Pasian Thuhoi Thupha phuon dan tha a siem jo ahi, chi’n agen hi.
Khovel pum a Synod peipi dan dinga alut kawm in Fr. Devadass thugen in Asia gam a synodality malam hun khu structure tha ama, programme dang amakhat a kinga ding ahilou ei theisah kiana poimaw tah a pie hi. A lawchinna khu tuolsung Pawlpite’n Pasian Thuhoi Thupha a hindan leh mission a khuolzin khawmdan ngaina banga synodality apawm leh pawm lou na ua pan a et ahi ding hi.
