Kinepna lienpi toh siengthou zinna ( The Pilgrimage of Hope) 2025 zani 27 November 2025 ni’n Penang khopi Malaysia ah thupitah in na kipantah ah,Asia gamkai ah gam 32 tah tel ua, tuasunga Cardinal 10, Siadaw 104, Siempu 155, Nganu siengthou 74, deacon 8, Pasian nasem 422 leh Khawmpi vai enkawl ding volunteer 90 pang uhi. Tam khawmpi sim ah pei milip agawm in 900 tah pha hi.
Inntepu Pu Sebastian Cardinal Francis , Bishop of Penang in vaidawn thugenna nei a, gam tuamtuam pan tam munah hing kalsuante nousietna nei masa in, khawmpi ah hing pang jousie kunga Asia mi leh katholik Pawlpi hinatoh pheiphung khat suankhawm in mailam hun ah nasem khawm ding vai chin hawnthawnna thu na gen hi.
Pu Sebastian in gen kiana ah, tukum Katholikte Jubilee Year hitoh kituoh in tam munah kikhawm thei aum jiehin Asia gamkai pawlpite hampha sah mama in, mailam World Youth 2027 jong Asia gam Seoul khopi South Korea ah um ding jong na thei sah sawnsawn in hamphat thu gen hi.
Tam vaiguon honna ah Malaysia Minister of National Unity Pu Datuk Aoron Ago Dagang zingun in pang a thugenna nei ah, Katholik pawlpite’n kilemna leh muanna leitungah um theizing na dinga a panlahte uh patatna pie hi.
Minister Pu Aoron in gen belapna ah Malaysia injong kilemna leh muanna um thei na dingin pan nasatah in lah ahi chi’n mipi kikhawmte kunga theisah bana, sakhua biehna jiehin koima kituam koi umlou in, kilungkhatna ding leh kilemna um thei na dingin panlah khawm vai chin na ngen a. Tualeh jong khat leh khat sakhua biehna tuamtuam hitah maleh jong ki jatat tuoh in Asia gamkaite’n panlah khawm vai chin na tangtoh hi.
Bishop George Pallipparambil Chairman FABC-OE in Asia gamkai pen sakhua jousie pianna gam ahi chin theisa ah, Ki balouna tampi umtah maleh jong khat leh khat ki jattat tuoh in, ki theisiem tuoh leh kilemna um thein a dingin kalsuan khawm vai chin ngen ah, tualeh jong tam bang khawmpi lawching tah ah, ki mangtheina dinga panlah jousie leh adiehin Penang diocese leh Malaysia kumpite kunga kipahna thu na gen hi.
Pu Cardinal Luis Antonio Tagle in Khawmpi kipantah chi etsana in khuaimei vah hal-tang in tam toh Khamwpi ni 3 sung daiding pen pat ahi tah ah, tamhun sunga a Asia gamkai lamkai tuamtuam ten thungetna, tasanna leh ngaina tawndan pulatna leh Asia gamsung thupawimaw tuamtuamte kikupna leh pawpi vai thu leh laa tampi genna nei tah ding uhi.
