Philippines gam a RVA Co-ordinator te Workshop neina ah Kipumkhatna leh Mission iitna nei dingin Bishop Junie in a thuhilna nei

Bishop Marcelino Antonio “Junie” Maralit Jr. in Radio Veritas Asia (RVA) language-service coordinator te Oct. 6 nia Silang, Cavite a Sisters of Mary, Girlstown campus a ni lang sung retreat neina ah iitna, kipumkhatna leh missionary vision kihawmtuo khu communication ministry a poimaw pen ahina leh nei dinga poimaw pen ahi thu agen hi.

Retreat hi RVA in Asia gam tuom tuom pan a coordinator-te dinga ni li sung workshop abawl ahia, Myanmar pan in language-service coordinator 10, India pan in li, Bangladesh pan in khat, Thailand pan in khat, Cambodia pan in khat, Vietnam pan in khat, Sri Lanka pan in khat leh China pan in khat atel hi.

Federation of Asian Bishops’ Conferences (FABC) Office of Social Communication chairman leh San Pablo bishop Bishop Junie in ang kikhawmte broadcaster, producer te hileh communicator te hitaleh ahina uh ahi masang ua ana kihil thu uh a theisah kia hi.

Khrist hatna aw, “Hing zui un, tuachin keiman nga namat bang un mihing man in kahing siem ding hi,” chi ngaihtuo pumin, coordinator te’n anasep uh professional mawpuohna mai a gel lou a missionary hatna banga ngai dingin a chiel hi.

Bishop Junie adingin technology, digital platform leh angaite kikhel lamdangna in RVA central mission, Krista leh Thuhoi Thupha phuonna asuhbuoi lou nadingin hilchienna anei kia hi.

Bishop Junie in language services te kungah, aw neilou/aw kizah piehlou gampem lutte, galtaite, khotuol mi, mi genthei leh zat-leh-nam neujote poimaw sah dingin chielna anei kia hi.

Retreat tawpna in, coordinator-te kungah dohna thum adong a, “Koite e i ngaikhietlou te? Bang e itheilou uh? I matang ua ibawlthei lou uh ibawlkhawm thei uh bang a um ei?”

Oct 5 pan a 8 sunga ni li sung workshop ah RVA coordinator-te’n missionary identity, digital transformation, sustainability leh Catholic media a sepkhawmna tungtang ah ngaituona leh genkhawmna hun azang uhi.

Workshop hi Fr. Felmar Fiel, SVD, RVA general manager leh Fr. John Mi Shen, RVA program director te lamkaina nei kibawl ahia Ms. Shirly Benedicto, secretary of the RVA Department of Programs workshop sunga hunkem in apang hi.

Workshop nei sunga session kineite hi Michael Unland leh Frank Craus-te’n amapui ua, RVA mission panpi funding agency-te thakhel a hing kalsuon ahi uhi.

Tami kikupkhawmna in Asia gam mun tuom tuom pan a RVA language-service coordinator te adingin sepkhawmna hatsahna, experience kihawmtuona leh Catholic media mission malam hun adinga ngaihtuo khawmna hun lemchang a siemkhie hi.