Philippines Gam a Communications (kikawmna) toh kisaia a toumun luopa (chairman) in tulaia dingin meihui tongsan khu kipatsahna mun leh muol hing suohta achi hi
Tulaia dingin meihui tongsan zanga Pasian na isep dinguh poimawta mama, ajieh pen leitung hi kinaw tah a tawntou jel ahia, khuohui banga kikhel tentun leh sil bangkim tel siemna hun zong ahita a, meihui tongsan hi kipatsahna mun leh muol hing suohta chi'n Archbishop Alarcon in agen gige hi.
Tam thu ahileh Quezon Khuopi a Pope John Paul II Auditorium a agen ahia, September 12, First Asian Digital Missionary Assembly a, ani ni nia ana gen ahia. Ama hi Catholic Bishops Conference of the Philippines a Social Communications a lutanga zong pang ahia, hichia kikhel pelpol leitung hi akikhel ding mawng ahia, ngaina dan a igamtanate uh pen leitung tawndan tha in ahing suh kalau mawng ding ahi achi.
Ikipatsahna uh ahileh tuipi tuita leh hui ahi nawnsih a meihui tongsan ahita hi chilei chikhielsih vai achia, "Tam mun leh muol ah iumta uhi" achi hi.
Meihui tongsan khu pawlpi dingin nasepna mun ahita a, itenpi ding leh izawpi ding khat ahita hi. Tam mun tha ah akoi mapou in thu leh la akim theia, kikawmna'n aki neia, thu leh la kanna'n akineia, mun leh muol tha ahing suohta hi achi hi.
Leitung khuohei dan pen akikhel zing ma ahia leitung tangthu en lei kum zabi sawm leh guh (16 century) lai in leitung tawndan leh ham dan ana kikhel mama a, hichi'n leitung imu dam uh ahing kikhel lamdang jel hi chi'n zong Archbishop Alarcon in agen hi.
"Tua khu leitung ahoi lam a sawpawina khat ahing suoh a leitung zong ahing kikhel pai ngal hi" achi hi.
Tu'n Pasian nasep nadinga kipatsahna mun leh muol hing suohta a nuom lei da lei meihui tongsan zong izah dinguh ngai chi'n agen kia hi.
