GPH Ni 3 : Cardinal Ambo David thugenna ah Asia gamkai Katholik pawlpite’n Jesu atha in gel kia vai chin tangkou

Kinepna lienpi toh siengthou zinna ( The Pilgrimage of Hope) ani 3 ni’n Pu Cardinal Ambo David, Vice President of FABC and President of CBCP in Khawmpi ahing kikhawm Asia gamkai mipi 900 mai ah thugenna neina ah Jesu atha in sui kia in gel tha kia vai chin tangkou hi.

Jesus tangthu genna ah Jesu pen akipat chillai in koima theilou mi ahia, Jesu in amasa in nuajui mi 2 akhawl leh ki hou mu ah, avanai ah athugente ana ngai masa hi. Jesu in thu ana ngai masa in tuajou in thu agen pan hi. 

‘’Jesu in thu angai masa bangin Asia gamkaite’n jong thu i ngai masa ding ua, Tuajou chieng Jesu thu igen ding ua tualeh amatoh ijaw khawm ding uhi chin’’ Pu Cardinal Ambo in hing kikhawm mite hanthawn hi.

Pu Cardinal Ambo in Jesu tulaitah in galtai leh vaitaite lah um ah, Innsung buaina leh hoilou na lah um ah, Khangtha social media a ngolte lah um ah, gal leh tual, khamthei guithei mite lah um ah, khuosiet, tuilet, jilling leh menchim jieha vangsiet tuohte lah um ah tualeh tasah leh lhagau jongkhal leh koima it lou mite lah Jesu um ahi chin gen hi.

Tuajiehin Jesu atha in gel kia vai ichileh tamna atunga kigen vangsietna tuoh mite ipanpi, ihenem leh  i it, i ngai leh Jesu atha a igel leh ijui kia  ahi chin kikhawm mite hanthawn hi.

Jesu ahileh mutheilou ahia, nichin in eite ei jui a, nichin in thu leh laa igen masang in angai zing ah, Kinepna lienpi ei pie ahi tuajiehin nichin silhoi, silpha mite tunga bawl zing vai tualeh chimlou in bawl tawntung vai chin chielna nei hi.