FABC 12veina Khawmpi nithum vingveng thu-le-laa, mipil misiem, Asia gamkai Pawlpi luboh ten genna nei ua, tuni’n toukhawm kihouna leh thudohna Pawlpi toh kisaite nei ua, tuana RVA ten Fr. Clarence Devadass, Associate Secretary of the FABC leh Khawmpi ah Synodality thulu ah mapuopa toukhawmpi in thudohna nei uhi.
Fr. Clarence in RVA thudoh masa dawnna ah, tam khawmpi ah thu-le-laa ki gen leh kihil jousie in aga suong ding alunggul thu gen ah, tuaban ah Asia gamkai catholic Pawlpi khu Asia pumpi ah kilemna leipi siem in pang henlen khotang leh khuosung, tasah leh hagau a hing hatsem ding deisah thu gen hi.
RVA in thudohna ah, Bishop ten aumna mun ah tam Khawmpi pan apuo ding bang deihuai nasa ei chin dong ah, Fr. Pa in Synodality pen aumna mun diocese leh parish, siempu, siete leh Pawlpi Lamkai tuomtuom toh semkhawm leh tasuo in hingsem unlen agasuong leh chin adeisahna thugen in, Synodality pen amin maimai a semlou ah, inntun chiengun atatah sem dinga tam sepsuo theina dingun Pawlpi Lamkai, siempute leh siete toh kithuja tuoh, kihoutuoh zinga mipi aw ngai in sem leh Pawlpi khantou ding ahi chin gen hi.
Thudohna tuom adawn kiana ah, Catholic leh Christian pawldangte pen Asia gamkai atam jaw ah, atom ua hinanleh tamte jieha lungneu lou ding ajieh Pawlpi etlawm mama a, tualeh Asia ah pawlpi kikhenna, nam kimudana leh gam leh gam kikhenna um zinga, hinanleh tamte jieha Pawlpi in kilemna leh kitheisiemna sem ding tampi anei jaw hi chin gen sawnsawn hi.
‘’Tuni’n gam tuomtuom pan mi 150 vaya tam Khawmpi ah hingtel ua, amaute’n innlam kileh chiengun Synodality thuhoi thupha khu ami-asa te leh Pawlpi sung ahing phuongza in hing mualsuo uhen chin Fr. Clarence in adeina thugen hi.
‘’Kikhelna pen eima apat kipan ahi, eima’n kikhelna inei thei chiengin, mite tunga kikhelna itungsah thei a, tuni Khawmpi ah tel jousie in kikhelna innmun ah puo chietlei chi hoisahna’’ Fr. Clarence in gen hi.
RVA in Asia gamkai pawlpite bangthu toh navaihaa nuam ei chin dong kia Fr. Pa in dawnna ah
‘’Kipumkhatna chin dongin, Asia gam pen chi, ham,tawn leh mel tuomtuom ngen tenna gamkai ahia, tamte ah i etleh kikhenna pieng zing dinga , Pawlpi subuai thei ahia, tuate enlou in kipumkhat in sem khawm lei Pawlpi khangtou zing ding ahi’’ chin gen hi.
Asia gam ah kikhenna um maimai hilou in, Bishop sung, siempu sung, siete leh Pawlpi sunga jong lungsim ki bahlouna tampi jiehin kikhenna um ahia, ahin Tuisop kitan apat in kipumkhat tah Pasian nasem thei hi ua, Pawlpi khu Bishopte, siempute amaimai hilou in ei ajong ahitah a Pawlpi hatna leh khantouna dinga mawpuona nei chiet ki hitah hi chin gen hi. Tualeh jong Fr. Clarence in genbehna ah Pawlpi sung pen bukim ngailou ding ahi ajieh mihing ngen nasem ahia, mikhielnate i etleh Pawlpi khangtou theisih dinga, tua jiehin kipumkhatna ngaipoima ah, kipumkhat tah Pawlpi ding sem poimaw dan thu gen sawnsawn hi.
