China a Katholik pawlpite’n ni khat in biehinn tha ni honna vai na nei uh.
Fides News Agency te thuphuon dungzui in Hankou/Wuhan a Bishop Francis Cui Qingqi in May 10 ni’n Hubei Province a Church of Christ the King biehinn honna ana nei hi.
Tami biehinn tungtang a tahlah ding khat ahileh, a biehinn nai hi meter 33 a sang ahi. Bishop Francis in athugenna ah, “Tami biehinn nai in a etsah ahileh tami nai na et chieng un Pasian vangam en uh nahi,” achi hi.
Tualeh tami China gam leitang hoi ah i ginna uh tu vai in aga hoi suong sah vai chi’n agen kia hi..
Tami biehinn letdan ahileh 525 square meters ahia, tualeh mi 500 tading a kilam ahi. Biehinn ban ah rectory leh parish center jong anei hi.
“Tami mun hi hagau lam a mun thupi tah hing hiva chi kinem mama ing”, chi’n Bishop Cui in agen hi.
Tualeh May 10 ni’n Bishop Paul Meng Ningyou in Taiyuan Archdiocese a Our Lady of China Parish honna leh thupha piehna ana nei hi.
Tami vai hi Pope tha kitel a lawpna uleh May 13 nia a patroness uh feast alawp ni uh kikal a kimang ahi.
Bishop Ningyou in pawlpi mite panlah apatat thu agen a, “Pawlpi neu hita ma uleh chin jong, na panlah na uleh na nasepte uh ettawn tah ching kasa mama hi”, achi hi.
Tualeh Pu Bishop in agen kia na ah, “Tami parish a kivai puoh dante hoi kasa a, tami parish ah pamgam nasem mite naki hal sah uh kamu a, Tami parish ah hinna akmu ahi”, achi hi.
Tukum March ha in China gam ah biehinn thum ana kihong a, a unpi in St. Joseph minpuo ahi.
Tami biehinn te ahileh Songjiang district a Tianma Church ahia Baoshan district a Beitaowan Church ahia tualeh Yiwu a Saint Joseph biehinn te ahi.
Chinese bishopte leh pawlpi lamkaite’n tami pawlpi khantouna te hi agam ua pawlpi mite ginna toh thuohhatna jieh ahi achi uhi.
Translated by: William Zo
