Arcbishop Poh:“Biehna tuomtuom” hina toh hilou in “unau” hina toh Kalsuon khawm a poimaw hi
Archbishop Poh hi President of the Catholic Bishops’ Conference of Malaysia zong ahia November 28 nia Penang khuo a Zinna Siengthou Khawmpi a athupi: “Asia gamkai mi hina toh zinkhawmna,” tungtang a athugenna ah Asia gamkai sunga tawndan tampi te leh pawlpi thu leh laa tungtang thute malam huna kinepna toh siemhoi ding thu agen hi.
Archbishop Poh in, “Pasian in tambang hunhoi ei pieh ahiman in, eite zong Asia gamkai mikhat hina toh kipumkhat vai,” chi’n siedawte, siempute, Pasian nasemte leh mipi anousiet hi. 2023 kum a FABC’s 15th General Conference a kihou khawmnate tuni’n Asia gamkaipi a pawlpi adingin lampi ahing suoh hi achi hi.
Kihoukhawmna
Archbishop Poh in FABC in 1990 kum akipat a ana pei pieh kihouna zungpi thum talahna anei hi: Biehna pawlpi toh kihou khawmna, tawndan tungtawn a kihouna tualeh migentheite toh kihouna ahi. Asia gamkai hi biehna pawlpi tampi tah hing pienna gam tualeh chi leh nam tamna leh migentheite tamna gam ahina toh kituoh in tami nkihouna thumte apoimaw mama hi achi hi.
Kizawhkhawmna
Athu maimai a hilou in tami hi Asia gamkai sunga zat leh nam tampi leh tawndan tuomtuomte toh kilungtuo tah a hinkhawmna leh sepkhawm thei nadinga pan lah khawm ngai ahi.
Pawlpi sung: Kalkhat suon khawmthei nading a siedawte, siempute, Pasian nasemte leh pawlpi mite’n khat leh khat tunga Hagau Siengthou aw angai ding poimaw ahi.
Pawlpi pulam: Kalkhat suonkhawmna hi pawlpi pulam ah zong Khristien pawlpi dangte leh biehna dangte toh kipawlkhawm a leitunga silsiemte iitna te tungah apieng thei hi. Tamte hi I nisim hinkhuo ua iman ding uh ahi. Kalsuon khawmna ichi leh lawm leh guol siem ding, lemna siem ding tualeh khuosung leh khuo leh hui siemhoi nadinga pan lah ding ahi.
Innvengte
FABC kithukimna khat ahileh biehna pawlpi dangte hi “pawl dangte” chi lou a “i innveng pawlpite” chi ahi. Asia gamkai sunga pawi leh lawm leh guolte toh annkuong iimkhawmna leh nisim hinkhuo iman khawm nate’n ei gomkhawm mama hi. “Khat leh khat innveng a ikikoi ngai ahi,” achi hi.
2033 kum
Malam hun en in, Asia gamkai a pawlpite 2033 kum adinga kigingkhawl dingin chielna anei hi. Tami kum hi Jesu Khrist thawkiana akum 2000 nading ahi. “Topa kunga bang letsong itawi ding uh e?” chi’n dohna anei hi. Tami tungtawn in imai kum sagi sunga ikisiemtha ua I zinkhawm ding uh poimaw ahi achi hi.
Ahuntawpna ah St. John Paul II kamteng agen a: “Khangnoute, noute hi malam hun maimai ading nahisih ua tu-leh-tu’n zong pasian a nahi uhi, Asia gamkaipi adingin siengthouna hinkhuo khaichi natawi uhi,” ach hi.
