PU POPE FRANCIS IN ZIATAN HUN DINGA THU APIEHNA
(Pope Francis’ Lenten Message)
Apieh Ni: 17 February, 2023
Thupi:
Ziatan Hun sunga tahsa dehna leh Zawkhawmna (Synod Journey)
U leh naute!
Matthew, Mark leh Luke in agiel Thuhoi Thupha simlei, Topa Jesu in amel lamdang tah a akhelna thu chientah in akhum uhi. Nuazuite’n Jesu ngaihsutte ana santheiloh jieh un, ama’n amahaw ahil hi. Tua masang lien in Simon Peter leh Siepa kikal ah kingielna ana om masa a, Peter in Jesu khu Sathau Kinupa (Khrist) chia aphuon vangin, Jesu in gentheina athuoh ding ana tahsangsih hi. Tuajieh in Jesu in ama ahosie a, “Setan, ka nuasangah om in, kei dingin ki palpuana nahi, Pasian lam ah na pangsih a, mihing lam na hunjaw hi” achita hi. (Mt.16:23). Tam jo in Jesu in Peter, James leh anaupa John muoltung sang khat ah ajawpita hi. (Mt 17:1).
Akum akum in tami tangthu hi Ziatan Hun a Nipi Nina ah akisim den hi. Tutungin Topa in mun tuom khat ah ei zawpi nuom hi. Nisim a ibuoinateng leh isepsate uh chim huoi tah a isep laitah un, “muoltung sang” khat a Jesu toh kato dingin ei kichiel a, hagau thasenna bawl ding leh hinkhuo atha a siem dingin tam muoltung sangah ei kichiel gige hi. Hichi’n Pasian mipi siengthote isuoh thei ding uhi.
Ziatan Hun sunga tahsa dehna pen kipiehkhietna khat ahi tualeh Pasian Thupha inzong ei tuom laitah ahia, itahsanlana leh Jesu izui ngaplohnate tu’n ituoisah kia dinguh kisam mama. I Siepa uh (Jesu china ahia) itheina uh thuuhsah deu vai tualeh suotatna lampi zui kia vai tualeh eima leh eima kipumpieh thaw in Jesu toh zawhkhawm vai. Sa lah sa loh, vot lah vot loh in omsih vai in, tomkhat a dingin leitung nuasie tadi va ui. Tam khuolzinna ngaplasih vai, lam to tama lezong, tha seng vai in kato vai lunglut tah in. Tulai tah in pawlpi in zawkhawmna kichi, pawlpi kisiemtha nadinga kikupna lienpi gam tuomtuom ah akineia, iunpi un pang chiet vai. Tutung Ziatan Hun sunga tahsa dehna ineite u’leh zawkhawmna kikupna a imuchiente uh gawm vai in pawlpi khanto nading hanchiem vai.
Tabor Muoltunga Jesu in anuazui thumte lungsim khuongaina (retreat) bawl dingin azawpi hi. Tua muoltunga amu dinguh pen ahinkhuo ua sil lamdang khat leh mangngil theiloh ding sil khat ahi. Tuana thupha amute uh midangte toh ahawmton dinguh ahi. Amu, azahte uh midangte kunga agen chiengun athum ua apanton uh ngai mama. Ei leitung khuolzin nalaite’n, Ziatan Hun sungin ei panpina deigawte va panpi vai in zawpi va ui. Jesu in nuazuite muoltung sanga azawpi mabangin, eite zong zawhkham vai in Jesu in eite ei hundam bangin eite zong khat leh khat kihundam vai.
Tu’n simmun a thulu ah tu vai. Tuni Thuhoi Thupha ah hichi’n akigiel a: “Tualeh amasang u’ah amaisuo akihengta hi: Amai ni bangin atanga apuonsilte vua bangin ahing vamta hi.” (Mt.17:2). Tam ahi ikhuolzinna ua itup idawi uh. Muoltung akato jo un, tua muoltungah Jesu toh adington uhi tualeh Jesu vangletna leh ama pan a hing tang khuovah lamdangtah khat amu uhi. Tua khuovah lamdang khu pam pan ahisih a, Jesu pan a hing vahdoh ahizaw hi. Hichia Jesu mel lamdanna leh athupina nuazui thumte’n amu ua, muoltung zuon a agiminate uh amangngilta uhi. Koipo muoltung sang akai dingleh, amalam aen chien a, alungsim akhuodahsahsih a atun nading muoltung dawn khu aento gige hi. Ahi’n tua muoltung dawn anopdan leh alopna in ei gimlasah mama. Tamma bangin tutung Zawkhawmna (Synodal Journey) kikupna ah zong thanopna tampi aom hi ajieh pen pawlpi khanto nadinga kikumte’n sil tampi ahing puodoh ding uhi. Tam kikupna zong sil baih ahisih a, hitama lezong tami kikupna ah Pasian deisahna tampi ahing luongdoh ding chi khu kinepna lienpi om. Tam khu Pasian gamlei nasepna khat in imu uhi.
Tabor Muol tunga nuazuite’n Jesu lamdanna amuchien ban ah, sil thupi khat amukia uhi: Mosi leh Elijah zong ahing kilanga, dan piepa Mosi leh kamsang lien penpa Elijah amu uhi. (Mt.17:3). Jesu mel lamdanna in bang ei hil ahei ichi u’leh, Jesu in sil josie asiemtha a, thului leh thutha agawm valonga tualeh Pasian chiemnate zong atangtungsah hi. Tuatham loh in Pasian in a mipite azawpi gige na akilang hi. Thuhun lui in lampi tha ei tuonsah ahi. Tuajieh in thuhun lui laia kihilnate ei ding inzong amanpha mama hi. Thuhun lui in tahsa solna izawthei nadinguh ei hilchien a, tulai khantonate lah ah eiki buolsahsih hi.
Ziatan Hun sunga tahsa dehnate leh Zawkhawmna a kikupnate tup leh dawi pen, Jesu banga in pawlpi in amel khelsah vai, eima mel zong khel vai chia tami kikupkhawnna kinei ahi. Jesu bangin imel leh pawlpi mel khel thei lei, tam kan omsih. Tam pen Peisan Pawi Thuthuh (Paschal Mystery) ah atangtung thei pan hi. Hichia pawlpi zong gul banga akilih thei nadingin, ke’n lampi ni tukum a dingin kawh nuom ing tualeh tam lampi ni ah Jesu in ei zawpita hen.
Lampi masa ahileh, nuazuite’n Jesu melhenna alung ua angaisut laitah un, Pa Pasian in nuazuite thu ahil hi. Tua aw in, “Ama thu ngai un” achi hi. (Mt.17:5). Tuajieh in, Jesu thu ingai dinguh kisam mama. Ziatun hun hi Jesu thu ingai hun uh ahi chilei chikhielsih va ui. Ziatan hun hi Pasian thupha imu hun uh ahi. Jesu in bang chibangin eite kungah thu ei hi lei? Amasa pen in, Pasian Thu ah ei hil a, tam pen Mass Siengtho sungah ingai den uhi. Pasian thu isimte uh mangngil paisih vai in, nisim in sim vai, internet pansa in sim tama lei zong. Aban ah Jesu in iunau sanggamte pansa inzong thu ei zasah hi. Tuate koi e? Ei panpina leh ei itna deigawte ahi ua, a aw uh ngai vai, adiehdieh in pawlpi sunga iunau sanggamte aw ngai vai. Khat leh khat aw ikingaipieh dinguh kisam mama. Pawlpi domsang vai ichi u’leh pawlpi mite thu ngai vai, khat leh khat aw ki ngaipieh chiet vai.
Muoltunga Pa aw azah chiengun nuazuite “akhupboh ua, ajauta uhi.” Ahi’n Jesu in amahaw kungah, “Tho un, jausih un” achita hi. Amit uh ahon chiengun koima dang amu nawnsih ua, Jesu beh amu uhi.” (Mt.17:6-8).
Ziatan Hun sunga lampi nina ahileh: pawlpi mi kahi, biehinn kai zong hakat mama ing chisih un. Hasatna tuomtuom leh kithutuoh lohnate jieh in biehinn kai hakat tuonsih un. Jesu pan a vah hing tang khu Thawkia Pawi thupina etsahna ahi. Tam khu ikhuolzinna ua itup idawi ihisah dinguh ahi. “Ama beh” mu vai, env ai. Ziatan Hun in Thawkia Hun ei tut hi. Lungsim Khuongaina (retreat) toh ngasih vai. Tam lungsim khuongaina ah Jesu gentheinate leh singlamte dawn a ashinate khu tahsanna, kinepna leh itna toh en vai. Hichi’n Jesu toh Thawkia ni in ithoton ding uhi. Tutung Zawkhamna kikupna ah zong Pasian in bang thupha ei pie diei, kinepna toh ngah vai. Jesu aw zakia vai: “Tho un jausih un.” Tu’n Jesu leh nuazuite muoltung sang pan a ahing kumsuh mabangin, eite zong tami kimutuona ah thu kum vai in mipite hindan khel pieh vai chi’n iki hantawh uhi.
Unaute, Hagau Siengtho in tu Ziatan Hun sungin pil leh siemna leh thahatna ei guonta hen. Tutung Ziatan Hun in Jesu toh muoltung sangah kato vai. Hichi’n Jesu thupina nuazuite’n amu bangun eite’n zong imu ding uhi. Itahsanna uh zong ahing kip deu dinga, kipah tah in izawhkhawm ding ua, leitung vah isuoh ding uhi.
Rome Khuopi, Siengtho John Lateran Biehinn, 25 January, 2023, Siengtho Paul Pientha Ni
Francis
