Tu-le-tu a Gemelli Zatou a kizen nalai Pu Pope Francis in hinkhuo hunkhiete (pro-lifers) patatna apie hi. Itheisa mabangun, leitung gam tuomtuom ah kumpite’n naulahna aphal a, nau tamtah anu uh sungah akithat a, nausen a million lam a lengin anu sung u’ah ahinkhuo uh atanta uhi. Damlou a zatou a kizen nalai hitama lezong, Pu Pope Francis hinkhuo hunkhiete patatna apie hi. Hinkhuo hunkhiete (pro lifers) kipawlna tukum toh kum 50 ching ahita uhi. Apeisa Kigin Ni in Movement for Life kichi, hinkhuo hunkhie kipawl khatte’n Pu Pope Francis avaveta ua, hinkhuo hutkhiet nadinga anasep uh apatat mama hi.
Cardinal Pietro Parolin, Vatican a Secretary of State in Mass Siengthou abawlna ah Pu Pope Francis thugen asim a, kum 50 na chin ni un, patatna hing buoh ing, tualeh nute in hasatah a nau aneidan uh zong apatat mama hi. Nana sep uh tawpsansih unlen, chin leh ha toh pang nalai un chi’n agen hi. “Kumtawn khangtawn in leitung hinkhuo ihutkhiet dinguh kisam tualeh ihinkhuo uh zatatna ipieh dinguh ahi ajieh pen Pasian siemsa mihingin asuhsiet thei ahisih hi” achi hi. Hichi’n Pu Pope Francis in zatou a alupna pan in hanthawnna thu ahawm jel hi.
