THAWKIA NIPI NI (Easter Sunday)
Thawkia Pawi Nipi Ni in Khrist shina pat a athawkiana akilawm hi. Nipi Ni a kilawm ahia,
Nipi Kal Siengtho tawp nil eh Ziatan Hun tawp ni zong ahi. Tam masangin Thawkia Ni
Thum sung (Easter Triduum) kichi aki nit a, Thawkia Pawi Hun (Easter Season) akipanta hi.
Itheisa mabangun, Khrist hi akikhailia jo ni thum jo in athokiata a, Nipi ni a tho ahi. Ama
thawkiana in bang ei musah ei ichileh, hoina in sietna, mawna leh shina ajota hi chi khu ei
musah hi. Tambanga Jesu thawkiana in Pasian tahsangte leh Jesu Khrist pom tapo, shina pat
in akikaitho ding uhi chi khu chientah in ithei uhi.
Thawkia Pawi toh Pasian in mihingte kunga achiemsate atangtungsahta hi. Tuajieh in ei
Khristien pawlpite dingin Khristien Ni Chiemtena (Calendar) sungah tami pawi hi pawi thupi
pen in akikoia, awl ni thupi pen zong ahi.
Kum zabi 150 AD pat tami pawi naki lawm gige ahia, tutan in ilawm nalai uhi. Thawkia
Pawi ni pen akiheng thei ahia, March 22 leh April 25 kikal a kimang gige ahi. Roman
Katholik Pawlpi sungah Thawkia Pawi pen halia jo a Nipi masa pen a kilawm ahi.
Thawkia Pawi Kiginna (Easter Vigil) kichi khu, Nipi zaw Ni Guh Siengtho zan a kimang gige
ahia, ngaina in Mass Siengtho asawt deu hi ajieh pen Mass Siengtho sungah Tuisawpna
Sacrament akineia, adieh in pichingsa numei pasal, pawlpi sunga lahlutte akituisawp uhi.
Nipi Ni pen Mass Siengtho atom deua, mipi ahing tam kai zaw hi.
#rvazoservice #rvapastoralcare #EasterSunday
