PAKISTAN A PAWLPI IN SINDH TUI LET THUOHTE DINGIN BADIN DISTRICT AH INN 50 LAM

Nau nga nei Monica Wago dingin guo thawmgin khu jauna thawmgin ana hi ahi. Suhlam Pakistan a Badin district a um amanu dingin mei kinim khu hui hat maimai hilou in anei agou teng a taan ding ahi. Kum tampi buon inn ah ana khosa a, Gam sunga mi tampi bangin, Monica te innkuon jong kum tampi tah mun tuomtuom a kituonna lampi ah ana awh ua, sing leh guo inn sie tahtah te a kikhum in, tualeh khuo leh hui kikhel jieh in thagum nasepna anasa a dei banga kivenhimna tah tah a umthei sih hi.

Himananleh tuni’n tuami jauna khu tehlei leh meivaah in akhel ta hi. Kum mi sung Catholic Diocese of Hyderabad panpina leh etkolna toh 2022 kum a tui leet jou in kho tha khat ahing pieng doh ta hi.

December 2025 in aki jou a, tami project Recovery and Rehabilitation of Flood 2022 Affected Communities Vulnerable to Climate Change kichi in Christian innkuon genthei 50 vel apanpi ta hi.

Pakistan gama khuo leh hui sietna mun jauhuoi a um pawl ahi jieh un Badin District in kum 2022 a guo tam lai in tui in sietna tampi ana tut a, masanga na um ngailou sietna lienpi ana tut hi.

Tuami hun lai in Sindh province ah guotui azut ngai sanga tam 426% vel ana thuoh a, sietna lienpi tah in gam 1.7-million-hectare vel a chim a, Pakistan gam pumpi ah million 2 val asu sie hi. Badin ah chuan tui hun sawtpi tah avei a, anntang-tuibuh leh khachi te asu sie a, ganhing khawi zong asang a sim in ashi hi.

Feb 16 ni’n inn kilam jou te hi kilawmtah in siempute, ngahnu siengthoute tualeh pawlpi mi tampi kikhawpna toh piehkhietna vaiguol ana nei uhi.

Tami panlahna a lamkai Bishop Samson Shukardin in mi gentheite leh panpi ngaite etkawl leh panpi ding pawlpi dinga tauvuon lientah ahi jieh a kipei pi ahi thu nasa tah in agen hi.

"I mite un ngaituoh pha lou hamsatna ana tuoh a, guo leh dai jau in ana khawsa ua, atate humbit dingin leinei a inn se tahtah te ah ana busa uhi," chi’n Bishop Samson in vaiguol nei sungin agen hi. "Tami mun hi innlamna mun maimai ahisih a, innkuon chinte hamuong a akimut theina ding ua mun siengthou khat ahi. Innbaangte akilam maimai ahisih a; khuo leh hui kikhel nasatna tunga eina muolliem san unaute kinepna su bukim khat ihi uhi," a chi hi.

Tam innlam na a van kizangte hi hun sawtpi tah sunga hasatna thuoh thei ding leh daal jou dinga bawl ahi chi tami kipiehna in a tahlang ahi. Tu masanga buon innte bang lou in, tam inn 50 te ah mi 6-8 vel inn khat chiet a um theina mun hi mailam hun a khuo leh hui sietna daal tho dinga kilam ahi. Tami khuo ah tui sieng zah ding hand pump tha 4, eh-buh kitup tah leh khotang kikhawpna leh vaiguol tuomtuom bawl nading multipurpose hall khat jong aki lam hi.

"Kou mamuna hi tam inn kilamte tun ding maimai ding sangin athuuh jo hi," chi’n bishop in agen be hi. "Training neina ding mun siem in tami khuo a numeite dopsangna hi ka ngaituona lien pen uh khat ahi. Nute’n siemna anei thei nading uleh naupangte jong an inn uh chip ding jau lou a akhan let theina ding leh a laisim thei nading uh ngaituo pipen ahi. Hinna ka siem ua khangnoute mailam hun ka bitsah uhi."

Diocese injong tami khosungah neh-leh-dawn te leh nehsuina lam a mapui dingin pan ala hi. Innkuon sagi in hamphatna nga in dawr honthei nading akibawl pieh a, tami te pan a lou hou lou a nehsui nading aki ngaituo pieh uhi.

"Rehabilitation dih tah kichi khu mikhat in a innsung mite avah nadinga poimaw vanzah pieh ding ahi," chi’n Bishop Samson in agen hi. "Bazar gei lah a dawr leh inn tun pieh na in tami sietna tuoh innkuonte awl-awl a akeng ua adin thei nading uh lampi kisiem pieh uh ahi.

Tami project hi tuolsung sorkar sum tel lou a peipi ahi lai in, a lawchinna khu international ecclesiastical cooperation ahidan langsahtu ahi. Khawvel pumpi huap in seppi Missio, Vision Teilen, Missionszentrale der Franziskaner, leh Aid to the Church in Need (ACN) te panpina neiah Diocese in St. Joseph Parish a agam ngei khu azang poimaw a, tuami khu a lawchinna leh kilawmtah a peipi thei ahi nading ahi.

Pawlpi panpi nate leh kipieh nate tungah anivei na in khotang in lungdam athuh hi.

"Tuni’n ka puohgih azangkhai ta hi," chi’n Monica Wago in a inn tha kawt maia din pum in agen hi. "Tami hi kibul pat tha kiana ahi a, mangngil theilou melchi na khat zong ahi."

Translated by: William Zo