NIPI ZAW NI NGAI NI HOIH (Good Friday)
Tatni Siengtho zong akichi hi
Tami ni in Katholik Pawlpi in Jesu kikhailiana aphawh hi. Khristien pawlpi dangte’n zong Katholik Pawlpite tawndan zui in tami ni anit uhi. Masang lai in Khristien pawlpi phasa khat in tam ni’n sathana leh annzaluina anei ua, ahivangin tulai in Katholik pawlpite tawndan ahing thei siemta ua, akikhailia Jesu auop zaw uhi. Gam tampi ah tuni hi awl ni in akimang hi.
Thuhoi Thupha sunga akigiel mabangin, Judas in Jesu aleheh a, aleheh ni ahileh Ann Luina Nukhia (Last Suppeer) aman ni uh ahi. Tuani’n Jesu aman ua, azingni in Jesu khu siempu lien Annas kungah ahing kai ua, thu akhen uhi. Annas in Pasian asamsie hi chi’n siemtanna apie hi. Jesu shina ding tan pen thu aneisih hi. Ama’n Pontius Pilate kungah asawlta hi. Ama hi tua gamkaia Roman uhpipa ahi.
Pontius Pilate in Jesu thu adonga, ahi’n shina tanna nading lawm mawna amu vawtsih hi. Hichi’n Jesu pen Jiu lamkaite’n amahaw dan in thu khenta uh heh chi’n akhut u’ah a apta hi. Roman kumpite dan dungzui in, Jiute’n Jesu athat theisih ua, tuajieh in thathei nading Pontius Pilate kungah angen uhi.
Pilate in Jesu that theiloh ahijieh in, Leng Herod kungah asawlta hi. Leng Herod inzong thathei nading ajieh amu tuonsih a, Pilate kungah anuasawlta hi. Pilate in Jesu shina nading ajieh amu loh jieh in akhut asawp a, Jesu tungtangah kei sai ding om nawnsih achita hi. Ahi’n mipite’n lungthah tah in Pilate kungah that teitei in achi jieh in, anuom ada in aphalta hi. Jiute lengpa kahi achi jieh in singlamte a khailia dingin apuita uhi.
Nipi zaw Ni Nga Ni Hoih ni in pawlpi in ann ngawlna anei hi. Pawlpi tawndan dungzui in tam ni in Mass Siengtho latna akineisih hi. Ahi’n Singlamte Jana (Veneration of the Cross) akinei a, mipi biehinn ah akikhawm ua, Jesu gentheina tangthu akisim hi. Singlamte jana akipieh jo leh thungetna tuomtuom akiman jo in siengtho pumpi sanna akinei hi. Siengtho pumpi pen, Nipi zaw Ni Li Ni Siengtho a valte akihawm hi. Tami ni in biehinn nai akisatsih a, tautunga vanteng akihiemkhie hi.
#rvazoservice #rvapastoralcare #GoodFriday
