Misiengtho Sebastian hi Piantit gam, Narbonne khuo ah ana pienga, Italy gam a Milan khuopi ah siem sin in ana om hi. Christiante’n Rome pan a athuoh genthei lai hun in galkapte kithuopi dingin Rome kumpipa Carinus khutnei ah Rome galkap in ana lut hi. Ama hi ahangsan jieh in Rome kumpipa veng dingin Praetorian Guards te lah a lamkai in ana kitel hi.
Christian ahi ang kithei nua in, 286 kumin Rome kumpipa Dioclesian mai ah thusitna ana kinei a, Thal toh kaplia dingin thukhenna ana nei uhi. Tuama bangin singkung khat ah aki khi a thaltang toh ana kap ua anuasie ta uhi. Christian meithai khat (St. Irene of Rome) in ana lungsiet a hoitah in ana kem a, ang dam kia hi.
Ang dam siengtho zoin St. Sebastian in Rome kumpipa mai ah Christiante abawlsietna tunga amawna thu hangsan tah in agen pie hi. Kumpipa alungthah mama a, satlia dingin thu apie kia a, aki tha zoin atahsa guom sungah apai sah hi. Pasian thuhat mama numei khat in St. Sebastian luong ana mu a, hanmuol ah ana vui hi. Tua mun ah tu’n St. Sebastian biehinnpi det tah in a om hi. St. sebastian hi galkapte leh thal kap, aki apmai mite (athletes) panpi misiengtho in aki melchi hi.
St. Sebastian aw, kote adingin thu ei nget pie in.
