Mexico gam ah 2019 kum a pat tu ha October 20 tan siempu 11 akithat hi. Tam gam ah siengnei mi suongnei mi, migilou sagilou, guta, misuomhat tamtah aum a, ahun ahun in siempute agalgih jel ua, phasa khat apaupui ua, phasa khat athat uhi. Tambang migiloute Mexico kumpi nasan in adoujousih uhi. Phasa khat kham thei guithei toh kiapmai mi ahia ua, thau zong thei bangin akitawi uhi.
Siempu hangsan deu phasa khat in biehinn sungah amahaw nuolna thu agen uhi ajieh pen pawlpi mi tamtash in athuoh law uhi, tualeh pawlpi mi tam zong athat uhi. Hichia amahaw nuol leh phawh ngam siempute'n eihaw zong ei bawlsie ding uhi chi athei chien uhi, hinanleh agen ding lawn uh agen ua, athuoh law uhi.
Africa Gamkaipi a siempute kihelbawlna toh akibang hi. Africa gam tuomtuom ah tote tamtah migiloute'n athat uhi. Hichi'n San Salvador a Pu Archbishop Romero zong migiloute'n ana that uhi. Mexico gam hi Katholik pawlpi mi tamna ahivangin migilou sagiloou atam mama hi. Pu Pope Francis in tukum May ha in hichi'n agen hi: " Hichia hinkhuo na pie siempute hi Pasian nasem dihtah ahi ua, amahaw sisan in Khristien pawlpite hansanna pieta hen tualeh kilemna hing tutta hen." Apeisa 2016 kum Pope Francis Mexico ah ava zinta a, Chiapa khuo kichi khat ah Mass Siengthou ava bawlta hi. Tamnah ama'n mipite genthei dan thu agen a, na gam uh ah thudih thuman atung naisih a hichi'n hesuoh gentheina na thuoh nalai uhi. Ke'n zong kahing thuoh hu hi achi hi. Siempu atamzaw migilou kipawlna (organised crime) a pangte tha ma ahia, tambanga tote kithana aveng bai ding ahisih hi.
