September 04, 2024 nikhoa simding: Luke 15: 11-32
AMANGSA HUNG KILE KIT
Tony Orlando in asah, "Tie a Yellow Ribbon Round the Old Oak Tree" (Gangpi phung lena chun ankampah-en ponhal ana khit in) kiti la hi 1973 lam chun ana minthang lheh jengin hijeh chun gal kon sepai In hung kile ho le In dalha jammang hung kile ho lemnan ankampah-en ponhal hi ana mang jiuvin ahi. Amapa hin thusim lui kiseison khat a kon a alah jong himai thei din tahsan aume.
Train a tou gollhang chapang khat hi alunggim lheh in amitlhi akitheh theh jengin ahile tehsepu khat in amudoh phat in alungsen anaipheiyin ipi ti ahi chu adongin ahi. Amapa chu ahung kap lhan, "Pu, kapa to kakinan In kadalhah hi kum 3 ahitai. Khopi tinna kipana le lungmonna kahol vangin kamupon asot channin In ka ngaina akibe jingin, ajonan In kile kit din kakigel lhatan ahi. Hijeh chun lekha kathot in, "Tunia hi train a innung kahin hopa ding ahin eingaidamuva hung kile dia pha nasah-u le innunga thingphung hoa chu ponhal kang ana khit un hinla nakhi louvu le avel a ikimu kit tah lou diu ahitai" kati ahitai" atin ahi.
Agah seichai hin train chun a-in nungu ahin phatan, gollhang chapangpa chu adipchah val'in thingphung ho chu avengam tapon ahi. Tehsepun, "Nang kunchah kheh tan, ken hinvet peh nange" atin akunsahnin agah ven ahile thingphung jousea ponhal kang akikhit cheh in ahi. Chapangpa chu agah thamin, "Chapa, ven, olmo tahih in. In nache thei ahitai. Thingphung jousea ponhal kang akikhit e" atipeh in ahile chapangpa chu kipah val'in akichom leuve, akiti.
Bible a Jesun Chapa vahmangpa thulem asei hi pan acha angailutna le akhotona thusim chule chapa jammang ho dia kinepna pejing ngainom umpen thulem ahijinge. Chapa jammang akilea apan ana nga a gal'a amua jong adel'a achop chuh chuh jeng bangin lhagaova chapa jammang tampi jong ipau Pathenin ikile diu angah jinge ti sumil pou hite. Ama douna le asei ngailouva ium vangun aman ichonset-u ngaidam din ikileu angah jinge ti heu hitin ipau Pathen koma kile kit tau hite tia katem nahiuve.
Dr. S. Chongloi
