Thupi: INNSUNG MAITAM
Tangtel: Maitam tungah mei akuong ngitnget dinga, amit ngai sih ding hi (Siempudan 6:13).
Kithawina sillatna dingah a mopuoh pen khu siempi’n a bawlding (sep ding) khu ginum tah a abawl angai a, abawl sih leh tua Maitam ah Mangpa akipah sih ding hi. Tuama bangin Innkuon maitam zong khu amopuoh dingpen Pa ahi a, Pan tami nasep angainep a ginumlou tah a abawl leh atung uah Pasian lungkimlou in kipahlou ding hi. Tami Maitam Pasian pomta ahitheina dinga mopuohna lienpi anei khu innsung a nu leh pate ahi uhi. Maitam a Mei akuon zing theina dingah Siempu in maitam amit louna dinga aven bangin, innkuon maitam a mopuohna la nu leh paten zong ginum tah leh chitahna toh innsung maitam a pan ala zing ding uh khu apoimaw ngaipen ding uh ahi hi. Tuabang a ginum tah a nna ahingsep chiengun Pasian Hagau Siengthou thuomna toh tua innsung a maitam kibawlte Pasian masang ah gim namtui bangin azam tou ding hi. Tuabang a Innsung maitam a pan anala zing Abraham, Noah leh Job bang a tunia innsung nu leh paten zong pan ala zing uh angai hi.
Maitam tunga mei akuon zing lou leh kithawina gansate khu a ui dinga, Pasian pomta hilou ding hi, tuama bangin innsung maitam ah zong nu leh paten ahing ngaisah lou ua, adawnse lou uleh, maitam tunga sa a namsia bangin, tua innsung maitam khu Pasian mu in namsia in pomta hilou ding hi. Pasian pomta innsung maitam alam thei dingin Mangpa Pasian in nu leh pate chitahna leh ginumna toh hing mapui chiet tahen.
Pastor M. Thangboi Zou
