NICHIN THUMNA PUITU By Rev. Awnkhankhup
April 12 (Sepkiani)
PASIAN NGAITUONA
Hinanleh nou vang in ka tung ah sil gilou nana ngaituo ua; ahivang in Pasian in tuni bang in, mi tampite hing-le-dam a a humbitna ding a silhoi tunna ding ana ngaituo zawh ahi. (Gen 50:20).
Joseph khu a pa Jakob a ding a tapa duot mama ahia, hinanleh a uten khuolzin mite kung ah a zua ua, mi inn a suoh nasem a a um ban ah suongkul a khum in zong ava um kha hi.
Atawp in Igipt gam vaihawm lienpen nuoi a mi lien leh poimaw ahing hita hi. Ama zuatu a unauten bu lei ding a Igipt Leeng inn a hing zot lai un, ann zuatupa khu a zua uh a naupa uh Joseph ana hita mai hi.
A theikhieh tah un a zau mama mai ua, hinanleh Joseph in amaute’n atung ah sil gilou ana ngaituo nan uleh Pasian in a hoi zawhna ding ua sil ana bawlta ahi dan a genpi a, koima kimaw sahlou ding in a hanthawn hi. Pasian ngaituona khu a dih in a thupi a, theisiem ahasa zel mawng ahi.
