NICHIN THUMNA PUITU By Rev. Awnkhankhup
August 10 (Nilaini)
KANA KHUO KI TENNA
Jesu’n a kung uah, “Tuibelte ah tui sung dim un”, a chi a, tuachi’n ama un belgong gei chiet in a sungdim uhi. Aman a kung uah, ‘Themkhat sawhkhie unlen, pawi nehbawl tuonvai lamkaipa kung ah va tawi un,” a chi hi. Ama un a va tawi uhi (Joh.2:7,8)
Kana khuo a Jesu’n uoin a suhpung khu a sillamdang bawl masah penpen ahi. Tami hun lai a kitennate ni sagi sung a lawm zel uhi. Jesu leh a nuazuite va pankhah ni khu a ni thum ni hidan a gen in ana um hi. Moulopna mun ah uoin khu dei hunhun a dawn thei ding a a um ding ahia, hinanleh mouneitute innkuon a hasat seng zieh uh zong himaithei in, a ni thumna ah uoin dawn ding a hing beita mawh hi. Jesun a tuibelte ua tui sungdimsah in, uoin humtah a suohsahta hi. Tam mun a mouneite innkuon in Jesu a na chielkhah uh khu abawl fuh mama uh i chi thei ding hi. Sil bangkim a i muolphouna ding hing liekhutu hiding in Jesu chiel zelzel va ui.
