NICHIN THUMNA PUITU By Rev. Awnkhankhup
August 12 (Ziltawpni)
UM LEH BEL SIENGTHOU
Tuaziehin mi koipou tam silte lah a kipata a kihepkhietleh, um leh bel manpha tah a zah ding a siengthou Mangpa zat taah, na hoi chinteng sem dinga mansa ahi ding hi (2 Tim.2:21)
I nehbawlna um leh bel-te siengthou lou in, dailenna inn (Latrine) leh kisilna mun (bathroom) vel ah umtaleh, a umlouna ding mun a um ahiman in silsieng sitset ahima teng neh ding bawlna um leh bel ding in zat taah ahisih ding hi.
Mangpa zat taah a siengthou hi ding in i umna ding mun ma a i um ding uh a poimaw hi. Khamthei-guithei chiing mite umna mun, lepguhna munte toh Khrist gingtute a kituohlou ahi chi thei a ngai masa hi.
Pasian in ama a ding a kikem siengthou zing ngap mite mama zang nuom ding ahi chi thei in, ama zah thei leh a zah ut gingtu hi thei ding in i hinna leh i umna mun a siengthou nai chi i kisui tinten ding uhi.
