NICHIN THUMNA PUITU By Rev. Awnkhankhup
August 16 (Sepkiani)
MANGPA NGAI A MIMAW
Mimaw in a lungtang in ‘Pasian a umsih’ a chi hi. Amaute a segawpsa ahi ua, silhoilou kidahhuoi tah a bawl ua; koima silhoi bawl mawngmawng a umsih hi (Sam 53:1)
Mihingte’n mimaw i chite uh khu, lungsim lam a guolphalou ahina zieh ua, a sie leh a pha theikhenloute ahi tangpi uhi.
Mibang dan a i ngaite lah ah zong, a mailam a sil tung dingte geel pha banlou a, a tuoh bang zel phutou mielmielte zong mimaw i chi zel uhi.
I Mangpa’n mimaw dan a a ngai chi ni a um thei a, a masa in ‘Pasian um gingtaloute’ ahi uhi. Tualeh adang khat ahileh, Sawltah Paul in “Ama un Pasian theinapi in, Pasian bang in a pahtawisih ua, kipaht
hu zong a gensih uhi, hinanleh a lungsim uah sil thulimloute a ngaituo zawta ua, a lungtang motnate uh a mielsahta hi. Pil kisa nan uleh a hing mawta uhi” a na chite khu ahi kia hi (Rom, 1:21,22).
I theiloukal un Pasian ngai a mimaw ana kihi thei ahi chi a kichien mama hi. Eima hinkhuo chiet enchien tha zel va ui.
