NICHIN THUMNA PUITU
February 03 (Seppatni)
Thulu: MANGPA HOINA MU DING LAM ENLOU HILENG
Aziehpen mangbatni chiengin a buhneu ah a hing phuol ding a, a kihumbitna biehbuh sung ah kei a hing sel ding hi. Mihing gam ah Pasian hoina mu ding kigingtalou hileng ka lungke gawp ta ding hi. Mangpa ngah in len hangsantah in um in, tuachin Aman na lungtang a hatsah ding hi (Sam 27:5,13,14).
Leeng David khu a melma ten tha sawm in a suol ua, tuabang a a hinna zauthawng huoi a a umlai in zong Pasian khu ama hundampa leh a bitna kulpi ahi dan a thei zieh in a bei dong sih hi. Zauhuoi na mun a zong a zau louna khu Pasian silbawl theidan leh a hoidan a theichien zieh ana hi zel hi. Hasatna tawpkhawh i tuo hun chieng in ba leh tawl in i um thei zel a, hinanleh buoiselou a hing um sah thei Pasian ahi chi thei a Ama i ngah zel ding ahi. Mangbatna leh lungkhamnate, natnate leh lusunna hial ituo hunchieng in, Setan in Pasian itna leh a hoinate muong ngamlou ding in ahing subuoi zel hi. Tambang hun chieng in Pasian a kinga a Ama i ngah zel ding uh ahi. Mihingte lungsim beidong pai a Pasian i ngah zoulou hun chieng in zong, Ama a kinaw ngai sih a, hinapi in a zekai ngai sih hi.
By Rev. Awnkhankhup
