February 04, 2025 nikhoa simding: Ephesians 2: 8; John 3: 16
MANBEI ITIU HI KOI HAM KHAT IN AMAN ANAPEH AHI
Manila kaum laiyin kaloi hon Seminary a course itobang um eihin dongun hijeh chun Seminary sunga degree course jouse athanom hon Course akilhen theina diuva kisem Flyer chu khat cheh kalan ahi. Kaloipa Nigeria ho khat to kahin ama jong kilah dia kasei le khat bou akilah in ahi. Kilahbe dia kasei le aman, "Rev. Chongloi, hilaiya mijouse dia free a akikoi vanga Seminary in paisa tamtah lut a asem ahin, nangin naloipa thot dia nakilah ahin ken khat bou hi kangai chat ahiye" atin ahi.
Hiche kajah doh chun kakin dot jengin ahi. Ajeh chu mi tamtah in manbei (free) ahipou le imanchah lou ding jong kikilah or kimoh neh neh kiti hi adih lou ahilam helouvin imot chon chonun ahi. Hilaiya eiho jousea dia manbei ahitheina chu koi ham khat in aman anapeh jeh ahi tihi igeldoh nomji pouve. Hijeh chun manbei ahile noppal thinna neidin bou igelun hichu dih lou ahi het angaiye.
Tulai ilah-uva umchan hoilou khat hi thinglhang hile phaicham hile kin aumle aguh a me kidop hi ahi. Me kidop jong hi sa le nga kichohlel ding jeh ahipon, chunga manbei (free) ivetdanu dihlou jeh khu hidin katahsane. Manbei ahijeh a noppal thinna neiding lunggel hin adihlou eibolsah-u hidin kagel'e. Hijeh chun kin a sa chu manbei ahipon koi ham khat in hahsa tah a aman apeh ahi ti heleu hen sa lulna (value) ihet-uva idop chatvai lou diu ahi.
Huhhingna Pathenin eipeh-u jong manbei ahi. Lungset mana tahsan vanga ikisanu ahin hiche tahsan itiu jong Pathen thilpeh ahinalaiye. Hinla hiche manbei huhhingna chu amanpesa khat ana umjeh a eihon manbeiya ikisan theiyu ahi ihedohji pouve. Nangin manbeiya nakisan ahin hinla apepa chun achapa chang khat hinkho achanlo ahi het angaiye. Manbeiya ikisan theina diuva Pathenin huhhingna chu achapa thisan a ana chohdoh masat ahi. Huhhingna hi manbei ahipon, thisan man ahi heleu hen nahsah moa ikoi ngamlou diu ahi.
Paul'in, "...lungset man'a, tahsan jal'a huhhinga um nahitauve, hiche hi nang hoa kon hilouva Pathen thil mohpeh joh ahibouve" ati. Chule John in, "Pathenin hi banga hi vannoi angailut ahin, Koi hijongle atahsan chan chu mangthah louva tonsot hinna anei theina din a-Chapa chang khat chu apetai" ati. Manbei itiu hi koi ham khat in aman anapehsa ahi ti heu hitin eikipeu huhhingna hi eipepau lungdeiyin mangu hite tia katem nahiuve.
Dr. S. Chongloi
