NICHIN THUMNA PUITU
January 28 (Sepkiani).
Thulu: JESU LAM EN ZING
Tuachin aman, ‘hing pei in’ achi hi. Tuachin Peter kuong apat in a kumsuh a, Jesu kung a pei ding in tui tung ah keng in a peita hi. Hinanleh, huipi hat tah amu tah in a zau a, tum ding in akisa a, ‘Mangpa hing hundam in’ chin a kikou ta hi (Mat.14:29,30).
Nuazuiten Jesu tuitung a pei amu un a zau ta ua, hinanleh Jesu aw a zah tah un a hamuong thei nawn uhi. Peter in Jesu kung ah, ‘Mangpa nangma ngel na hi leh tui tung a nangma kung a hingpei dingin thu hing pie in,’ achi hi. Mangpa Jesun zong , ‘Hing pei in,’ achi hi. Tuachin, Peter in Jesu a en a, akung lam zuon in a pei ta hi. Hinanleh Jesu lam enlou a, huipi hattah a mutah in a zau a, tum ding in akisa hi. I mihing hinkhuo uh khu lungkhamna huipi leh mangbatna tui kihot ten a tuom zing hinkhuo ahia, zauthawng leh mangbang in i um zel hi. Tambang a ihasatnate Jesu kung a itut chieng in Aman ahing zaw sah zel hi. Jesu lam enlou a, i lungkhamna leh i mangbatnate maimai i et chiengin i buoise paipai zel uhi. Hasatna leh beidotnate ituo hun chiengin Peter mabang in Jesu i han paipai ding a, tuachin Aman i hasatnate ahing zawsah zel ding hi.
By Rev. Awnkhankhup
