IHMU THEI A OM MANPHA HI NA MAIZEN E.!
Ihmut theih leh ihmut theihlouh pen ei thu ahi kei a, i gennop pen tuh ihmu thei a i om hampha leh manpha ahih dan leh ihmut theih pen nak man tamlua ahi chih gen nuam ihi zaw. Mihing te i kibang kei a a khente taksa hatlou ziak bang, Damtheih louh ziak banga ihmu theilou tampi ki om ding hi. A khente lah lupsuk leh ihmu sukpah niknik om hi. Ihmu thei hetlou a mitam pi om lai in ihmu thei a na om hampha na ki sa hia unau??
Ihmu theilou a om pen nak haksat lua hi. I hihtheih lah om hetlou na pi in banglou teng ngaihtuah a a se teng bang kipia a eileh ei bang ki ngaisetak khawng a omtheih mok hi. ngaihtuahna bang pai hat mahmah hi. A bul a pan zel a tawp tung zel i hihtheih lah omlou hichibang a hinkhua zang a zan hun chimhuaitak a khovak di ngak tuh ningkitel huai tak ahi. A diakin phalbi zan bang sawt mahmah diak hi. Gentheihna chikhat ahi. I gei a lum a ihmu hithit thei te bang en huai vungvung mai hi. Ihmut theihlouh hiai bang a haksa a hih laiin ihmu thei a hon omsak tu Toupa kiang kipah thu na gen ngei hia Lawm!!??
Damlouhnate ziaka ihmu theilou a om lou a, dam gegu a le ihmu theilou a om theihluat hina pi a, ihmut hun a ihmu thei a zing thoh hun a thou khe thei zel a na om pen thupilua in manpha lua hi. Nang leh kei ziak hilou in ihmut theihna hon petu Toupa ziak ahi chih phok thak ni. Ahi di himhim hi zenzen lou ahi. Ihmu paisuak a le om theih hilai, khophok hetlou a ihmu hang a zingkhovak hun a hon khanglou saktu Toupa ahi chih a thak in phok thak in kipah thu le gen theih dan ki zil zel ni uh maw. A hoihna leh a vualjawlna kia va nget nget le kisuanlahhuai ahihdan le theih din a hoih hi. Niteng hun teng in Toupa honpi dan te ah kipahthu gen di tampi om hi. I tung a ahoihna te ziakin kipahthu gen thasiallou in kipahthu gen chiat sawm ni..!
A honpi na tung a kipahthu gen thei chiat din Simtute Toupan hon vualjawl chiat hen aw.
✍ Mawi Tawmbing
