NICHIN THUMNA PUITU
October 14 (Seppatni)
Thulu: BELAMPU AW BELAM IN ZA
Ka belamten ka aw a za ua, ken ama uh ka thei hi, tualeh ama un a hing zui uhi. Tualeh ken kumtawn hinna ka pie hi; kum tawn in a mangthai sih ding ua, koiman ka khut apat a hing lahpieh thei sih ding uhi (Johan 10:27,28).
Belam leh belampu kichimatna khu a aw uh a kizahtuo theina uh ahi. Belam khu a pu in a pui huoi a, belamten apu a zui zel uhi. Belampu in a belamte it ahiman in, zauhuoi chinteng te lah apat a veng bit zel hi.
Tuamabang in gingtute a ding in Jesu apat gamla tah a um khu a bithuoi sih a, a aw ging zaphaban thei ding a akung nai a umzing a poimaw hi. Ama tang a gamta leh vahmang zing belam khu melma in man in a petlum zel hi. Gingtute zong i bitna ding uh Jesu kungnai a i umzing ding uh ahia, tuakhu i bitna ding a poimaw pen zong ahi zel hi. Jesu aw za phaban ding in a kungnai ah um zing va ui.
By Rev. Awnkhankhup
