Cardinal Müller in Charlie Kirk khu ‘tahsanna shipi’ (martyr) ahi achi hi tualeh ‘dawi biena (satanic worship) neite aphawh hi
Germany gam a Cardinal Gerhard Ludwig Müller in tu ha a USA a kithat Charilie Kirk khu tahsanna shipi ahi chi’n aphuong hi. Khristien pawlpi thuhil dungzuia hinkhuo namanga, a Khristian tahsanna ana shipi ngam jieh in ama zong tahsanna shipi (martyr) chia minvaw thei ahi chi’n doh leh dawnlimna aneina ah ana gen gige hi. September 10, 2025 nia Utah Valley University a sangnaupangte maia athugen laitah a naki kap ahia, ashi jou in dawi bie pawl khat in ama shi alawm uhi. Charlie Kirk pen Katholic pawlpi mi ahisih a, hinanleh pawlpi tahsannate ama’n ana pom gige a, numei leh numei kipawlna, pasal leh pasal kipawlna tualeh naulahna chihaw ana ngiel zing gige a, ei Khristien mite tawndan dih ahisih chi’n ana ngiel zing gige hi. Ama na ngielte ma in ana tha ahi.
Pu Cardinal Müller in “Kirk in ahinkhuo Topa a dingin ana pie gige a, thudih thuman ana dau gen ngai vawtsih a, Pasian lim leh mel a kisiem ihi uhi tualeh zuou thu gente leh biehpiehna a tahsa atte ana ngiel tawntung hi” chi’n tua interview (doh leh dawnlimna) ah agen hi. Thei dinga kilawm in tumlam ah naulahna, dawi biena, numei pasal suona, pasal numei suona (transideology) kichi aminthang mama a, tamte Kirk in ana dou gige ahia, mun tuomtuom a athugennatengah ana dou zing hi. Hichi’n Khristien hinkhuo siengtah in ana manga, dih asahte mipi mai ah hangsan tah in ana gen hi. Cardinal Müller in hichi’n Kirk ana patat hi: “Kirk in mihing kitenna leh innkuon asienthou dan ana pomdet a, mihing hinkhuo hi zatatna pieh ding ahi chi’n zau lou in athugenna jousie ah ana phuong teitei hi.”
Kirk ahileh Evangelical Christian pawlpi mi ahia, sangnaupangte kunga thu agen laitah a na kikap ahi. Akikap masang lien in thu kidong khat adawn laitah ahia, tua thu dong pen university sangnaupang khat ahia, athudoh ahileh numei pasal hina kikhelna leh thauvui thautang deibanga zahna tungtang ahia, adawndan thusuo a akizahsih vangin, tambang silte phal ding mawngmawng hisih chiva chi gintat um. Akappa ahileh Tyler Robinson akichia, ama hi pasal hinapi pasal dangkhat toh akingai laitah ahi. Tu’n ama thu akisit laitah ahia, akisit dungzui in adawng hi chi’n thu akiza hi. Ashi masang, ha thum ha li ahiei khat in ama’n, “Ka tahsanna ka pomdet jieh in mi’n ei thei zingleh nuom ing” ana chi hi. Ageina chin ah nau pieng nailoute anu sunga tha ding ana khaam gige a, tualeh numei pasal ihina khel thei vajieu ahisih hi chi’n ana giel let a, thu inzong ana gen let hi.
Mipi’n ama kitha a-awi vawtsih ua, hinanleh ama muda mi phasa khat in ashi ni alawm ua, dawi abie ua, dawi kungah lungdam athuh valong uhi. Hichia ama shi lawmte tungtangah Pu Cardinal Müller in hichin agen ahi: “Dawngmangpa in hichia hinkhuo muda leh thudih neia um nuomloute dawngmangpa’n ana man teiteia, chiillai pat juouthu na gen apa uh uhna nei ah aum uhi.” (John 8:44, 47).
