Bangladesh gam a Katholic nurse khat in International Nurses Ni in kipiehkhietna leh kichiemphatna lah

Tukum May ha 12, 2026 nia ki kilawm International Nurses Day in “I Nursete uh, i malam uh ahia, thanei nursete’n hinkhuo ahundam uhi” chi Thupi in anei uhi. Tami thupi in dam leh bitna piete lung akhoi mama hi ajieh pen chinate venna ah sil kisamteng akim jousih hi. Adieh in Bangladesh gam ah nursete akiching jousih a, anasep dan uh etlawm ahuoia, nisim a china luna huoite dingin kitawh hangna khat ahing suoh gige hi.

Hichia patat huoi tah a nasem khat ahileh Elizabeth Corraya ahia, kum 40 a upa nurse khat ahia, Dhaka Khuopi a National Institute of Kidney Diseases and Urology a sem ahi. Zatoua mi kiatte lupna zawn a sem ahia, kiat joua hing dam pante enkol ahi.  Dam leh bitna apieh ban ah malam lungdonpi innkuonte zong azawpi gige hi.

Bengali limpia (cinema) tuomtuom a mi khuotuote nasep ana et gige jieh in kei zong nurse suoh va ing chia aneulai pat a ana lunggul gige ahi.

“Ka neulai in Bengali cinema tamtah Ziltawp Nitengin kana en let gige a, limpia a hinlah (actor) Shanana nurse a kisiem ka en let a, nurse suoh ding ei lunglutsah mama hi” achi hi.

Aninu Sr.Gaetanina Corraya, Catechist Sisters of the Immaculate Heart of Mary, Queen of Angels in ana hanthawn gige a, hanchiem lachin nang zong ni khat nurse na suoh ding hi chi’n thu ana mop let hi.

Tu’n amanu hi agam a zatou minthang pen khat ah nasem in apanga, tam zatou a kiat (surgery) joute kepna mun ah asem a, nai 24 sung vingveng aenkol hi.

“Ka zatou u’ah zingmawng simsiel in chinate akiat a, akiat jou un kei panna lupna zawn ah ka enkol hi. Lai poimawteng ka suttuo a, zatui zaha ka pie a, zatoute ei se dungzui in chinate ka kem hi” achi hi.

Nurse Elizabeth dingin nurse nasep hi nasep guoh in amangsih a, jat leh nam, biehna tuomtuom mi bangma langpanna neilou in aenkol gige hi.

“Tam nasep pen kei dingin mi jousie panpi theina khat in ka mu a, bang nam bang jat ahi uoi, bang biehna ahi uoi chi ka thupi sesih a, kibangin ka khuotuo uhi” chi’n agen ahi.

Aha sum leh anasep in mipi deisahna atangsah a, ama innkuon guoh hilou in, ahieng asan kitasamte zong apanpi gige hi.

“Tam nasep jieh in keima innsung dinmun zong ahing lawchinga, ka innsung mite sum leh pai toh ka panpi jel hi. Hichi’n mipi’n ka dinmun ei zatatpi uhi” achi hi. Ahun hun in hasatna tuomtuom ang um jel a, adieh a puul (epidemic) ahing tun chiengin kana sep uh ahing gih deudeu a, hinanleh tulmaw dungzui in ka sem mielmuol hi.

“Khatveiteng puul ang tung jel a, tuachiengin kou zatoute leh nursete kaki tawkai pai ua, kouma zong puul in ei tut thei ahi chi thei napi in, hangsan tah in puul phuate ka zen uhi” achi hi.

Elizabeth in hichi’n agen a: “Khristien nurse khat kahina dawl in, lungkhing tah in mi chinate ka kem hi. Jesu tungtang bangma thu ka gen samsih a, ka nasepna leh ka khuoheina tungtawn ah Jesu thu ka gen veve hi” achi hi. Zatou a mi ashi khahleh, a innsung mite athangpai jel ua, kou zatoute leh nursete ei ngawh jel uhi. Ahun ahun in zatou sungah kihauthangna leh van suhsietna ahing um jel a, hitama lezong pum thuoh in ka thuoh uhi” chi’n agen hi.

Hasatna bangza um tama lezong Elizabeth in a Khristien tahsanna akiemsah vawtsih hi. Ta ni aneia, china lunate dinga anasep khu Khristien tahsanna phuonna in anei hi.

“Khristien nurse khat kahina dawl in, mi china ei kingansiete it leh ngaina toh ka enkol a, amahaw etlawm in ka um hi” achi hi.

Amanu gendan in siempu phasa khat in Elizabeth umtandan khu umdan siengthou in amu uhi.

Amanu’n zong hichi’n agen gige a: “Ka kep chinate leh ka innsung mite’n Khristien nurse khat kahi jieh in Khristien techi khat na suoh hi ei chi uhi” achi hi.

Chinate lupna mun ah thu angen let gige a, thungetna in tha ei pie mama achi kia hi.

“Natna lel mama china khat geia ka um chiengin, koima jah louin thu ka nget pieh a, Jesu aw damna guon inlen athuohna kiemsah in chi’n thu ka dapnget hi” achi hi.

International Nurses Day ni’n Elizabeth in “Kumpi zatoute ngam zaw vai ajieh pen kumpi zatou ah kizenna amantawm zaw a mi zente zong akipumpieh zaw uhi” achi hi.

“Kumpi zatou ah china luna tamtah nisim in akizen hi. Hichi’n zatoute leh nursete’n siemna ahing nei ua mipite’n sum leh pai tampi seng lou in akizen uhi” achi hi.

Bangladesh gam ah mi 1000 zen dingin nurse 0.66 beh aum a, mi tamza a dingin nurse khat zong anei jousih uhi. Suhlam Asia Gamkaipi a dingin angiem pen suoh. Kumpi zatou ah nurse khat in panmun aluo sungin mi 15 leh 30 kikal azen hi. Tawm tama uh lezong tam gam ah nursete’n chinate zen thei dandan in azen ua, hasatna tam tama lezong, lungkie loou in apang vevaw uhi.

Elizabeth tangthu ngai lei, tukum International Nurses Day a thupi atangtungsah ua, azong akalsan nalai uhi. Chinate kizenna a nursete tawm nan u’leh chinate, mihing lawchinna leh kinepna kikal ah palai in apang uhi