Mark 2: 1-12
Jesu’n aphalshipa adamsahna
Tualeh ni bangza ahiei nua in Kapernaum khuo ah ahing kile a, inn ah aum chithu ahing kithaangta hi. Mi tampi khat ahing kikhopjieh un, a inn sung leh akotlam nasan ah zong mun a-awng nawn sih a, tuachin aman thu ahilhta hi. Tualeh pasal li in aphalshi khat ahing puo ua, akungah ahingpeipi uhi. Mipi atamseeng jieh in Jesu kungah apeithei sih ua, tuajieh in aumna toh kituoh in, inntung aphetvang ua, ahawmsahzou un, phalshipa a lupna pum in akhai suh uhi. Jesu’n agintaatna uh amubep in, phalshipa kungah. “Ka tapa aw, namawnate maisah ahita hi.” Tua sunga laigiel mi pawlkhatten alungsim ua kidongtuo in, “Tampa’n bangdinga, hichibang thu agen amah? Pasian gensie ahi! Pasian loungaal koi ahiei mawnate maisahthei?” Tualeh Jesu’n alungsim in amaute lung sunga akithudohnate uh atheikhie a, akung uah, “Bangdinga khum banga na lungsung ua kidong nahi uoi? Aphalshipa kungah, ‘Na mawnate maisah ahita,’ chi leh, ‘Thou inlen na lupna la inlen peitan,’ chi khu koizaw abailam zaw e? Hinanleh Mihing Tapa’n leitungah mawnate maisah nading thu anei hi chi nathei na ding un,” chin, phalshipa kungah, “Nakungah kahing gen hi, thou inlen, na lupna la’nlen na inn ah peita’n,” achi hi. Tualeh athoudoh a, alupna la in amai uah apeita hi. Tuachin lamdang asa ua, tualeh Pasian pahtawi in, “Tambanga sil um akimu naivawt sih hi,” achi uhi.
