Matthew 3: 1-12
Baptispa John thugen
Baptispa John tua hunlai in ahing peia, Judea gamdai ah thu agen kawi a, “Kisia un(h), van a leenggam hingtun nading anaita hi,” Guolnei Isai in: “Gamdai a mi kikoupa aw in, Topa lampi siel unlen, alampite siemtang un,” achi hi. Tu’n John in sangawngsau mul angkii khat asil a, tualeh akawng savun kawnggah in agah hi; a ann-neh pen khauphe leh gamkhuoizu ahi. Tuajouin Jerusalem khopi leh Judea pumpi leh Jordan kiimkot a gamkai jousie a mipite akungah aahaw ua, akhelnate uh apuongkhie ua Jordan luidung ah amaute tuami pa’n baptisma (i) atangsahta hi. Hinanleh Pharisaite leh Saddukaite tampi khat aki baptis dinga hing pei amu chiengin, akung uah: “Nou guul suonte aw, lungthahna hing tungding taisan dinga hing thuhil koi ahiei, kisiana toh kilawm in ga hing suong un, ‘Abraham pen kou pu hina,’ chin ‘ngaisut sih un; Pasian in tana suongte lah akipat Abraham tate apiengsah thei hi chi kahing hilh hi. Tu’n zong sing jung pouma ah heipi akikoita hi; tuajieh in singkung agahoilou pouma aki phua a, tualeh meisung ah akipai hi. “Kisia nadingin ken nou tui toh ka hing baptis a, hinanleh kanua a hingpei dingpapen kei sangin ahaatjaw hi, akedap tawitaah kahisih hi. Aman Hagau Siengthou leh mei in nou ahing baptis ding ahi. Aman aphuoljaap atawi a tualeh abuphuol ajaap sieng dinga, tualeh abupang ah asungkhawm ding hi, hinanleh busi pen meikuong mittheilou sungah ahaaltum ding hi,” achi hi.
