Matthew 15:29-37
Jesu’n mi tampi adamsahna
Khumin Jesu khuna pat in apei a, Galili tuipi gei ahing tung hi. Tuachin muol akaltou a, tuanah atouta hi. Khumin mipi honkhat keengbaite, mittote, haamtheiloute apiengkhielte leh natna dang neite, akungah ahing pei ua, akeengbul ah akoi ua, tualeh Aman ana damsah chietta hi. Tuajouin, ahaamtheiloute ahing haamthei ua, apieng khielte ahing hoita ua, mittoten khuo amutheita uhi chi amu chieng un, lamdang asata uhi: tuajieh in Israelte Pasian khu apahtawita uhi. Mipi tulli avahna Tualeh Jesu’n anuazuite ahaan a, “Mipite ka kungah nithum um ahita ua, neh ding bangma aneilou jieh un, ka khotuo a, ann ngawl in peisah utsing, da chiengin lamkaal ah abasamkha ding uhi,” achi hi. Anuazuiten ama kungah: “Mipi hijapi vaah nading ching tanghou gamsip ah hei sunga kila ding ahiei?” achi uhi. Jesu’n akung uah: “Tanghou pheeng bangja nanei uoi?” achi hi. Tualeh amauten akungah: “Tanghou pheeng sagi leh nga tawmnou khat,” achi uhi. Tualeh Aman mipite tuol ah atousah a, Khumin tanghou phal sagi leh ngasate la in lungdam thu agen a aphalsuo a, nuazuite kungah apie a, nuazuiten mipite kungah ahawm uhi. Khumin aunpi un ane ua, agil uh avachiet a, anehmawhte uh akhop uleh seu sagi adim nalai hi.
