LUKE 19:11-28
Talent gentena
Tam thute angaikhiet laitah un Jesu’n gentena thu khat agen hi. Tuabepin aman Jerusalem ahing naita a, tualeh amauten Pasian leenggam kintah a hingtung dingin ana ngaisun uhi. Tuajieh in amaute kungah, “Khatvei mi thupi khat ana um a kumpi suoh ding in gamdang ah khuol avazin a, a inn a hing peikia asawm hi. A suoh sawmte ahaankhawm a tualeh talent sawm ape chiet a akung uah, “Ka hing kile masangsien tami’n summeet nabawl un,” achi hi. Hinanleh ama khu a miten a muda ua, ama nua ah thangkou asawl ua ‘Tam mipa katung ua vaihawm dingin ka deisih uhi, vachita’n,’ achi uhi. Khuchia ama a leeng thuneina toh ahing kiletah in a sum apiehsa asuohten a summeet bawl dan uh atheinuom jieh in amaute akung a hingpei dingin ahaan khawmta hi. Amasapenpa amasang ah ahingpei a,‘Pu aw, nang talent pieh sawm in ka na pungsah hi,’achia. Khumin aman akungah, ‘Bawlhoi chie, suoh hoi! Tawmnoukhat tunga na gin-um jieh in khopi sawm tunga thunei in pang ta’n,’ achi hi. Tualeh aninapen ahing peia akungah, ‘Pu aw, nang talent pieh khu talent nga in ka na pungsah hi,’ achi hi. Tuamin aman akungah,‘Nang zong khopi nga tunga thunei in pangta’n,’ achi hi.’ Khumin adang khat ahing peikia a, akungah, ‘Pu aw, na talent pen tanah aum hi, khosa nuulna puon a tuom in kana koituup hi. Nang mi genhapi nahi jieh in ka hing giing hi: na koi loupi zong na kilaah zeel a, na tu loupi zong na ki-aat zeel hi,’ achi hi. Aman akung ah ‘Nang suoh gilou, na kamsuo ngeel ngeel in siemmaw kahing tangsah ding hi. Mi genhapi kahi chi nahing thei a, tualeh kakoilou pi zong ka kilaah a, ka tuloupi zong kaki-aat hi chi natheisih amah? Hoi e, tua ahileh bangdinga ka sum ameet toh ka laah nading a sum koikhawmna inn a nakoilou nahiei? achi hi. Khuchin aman akunga dingte kungah, ‘A talent laahpieh unlen sawm neipa kungah pie un,’ achi hi. (Tuamin amauten akungah, ‘Topa aman ta lent sawm anei hi,’ achi ua.) ‘Ka hing hil ahi, koizong anei tapou piehbe ahi dinga, hinanleh aneilou khu anei sun zong laahpieh in aum ding hi. Hinanleh tua ka meelmate, atung ua ka vaihawm ding deiloute ka kungah hing pui unlen, ka mai ah that un,’ achi hi.
Jesu Jerusalem aluutna
Khumin, aman tami thute a genjou in, ana masa a, Jerusalem lang azuontouta hi.
