LUKE 13: 22-30
Kot neu ah luut un
Khuchin Aman thu a hilpum in kholien leh khoneute atuon kawi kawi a, Jerusalem lang azuontouta hi. Khumin mi khenkhat in ama adong ua,“Topa, hundam a umte atawm ding uh amah?” achi uhi. Tuamin aman akung uah, “Kot neu a luut teitei ding in hanchiem un, ajiehpen, kahing hil ahi, mi tampi’n luut asawm ding ua, hinanleh aluut theisih ding uhi. Inn-neipa ahing thaw a kot ahing khaahzou nuasang nou apulang ah nading ding ua, nakiu ding ua, ‘Topa kot hing hon ven,’ nachi ding uhi. Tualeh Aman nou hing dawng in,‘Heisung mi nahi uoi? Hingthei kha vawt sing,’ ahing chiding hi. Tua chiengin nouten ‘Nakungah kane ua ka dawn uhi, tualeh gawldung tengah zong nahing hil hi,’ nachi ding uhi Hinanleh Aman,‘Kahing hil ahi, noute hei a hing kipan nahi uoi chi kang theisih; nou silhoilou bawlte kakung akipat in pawtkhie un’ ahing chi ding hi. Abraham, Isaak, Jakob leh guolneite Pasian gam atung ua, noutepen pulanga paikhiet a um nahi lam uh nahing kimu khiet chieng un, tuanah, ka leh hagawina aum ding hi. Tualeh suo lam leh tumlam akipat tualeh simlam leh mallam akipat in mihing ahingpei ding ua, Pasian gam ah dawkan ah atou ding uhi. Tualeh en in, amasapente anukhia ua, anukhiate amasapen in apang uhi,” achi hi.
