Luke 8:4-15
Haichithepa gentethu
Mi tampi ahingpeikhawm ua akhuo khuo akipat in mipi ahingpei ua, aman gentena in thu agen hi. “Haichithepa khat haichi the dingin akuon a, aman athe hun in khenkhatte lampi dungah atu ua, kengin akituon thop ua, tungleeng vate’n anejou siengta hi. Tualeh khenkhat suongsilei lah ah atu ua, ahing poujou in agawpta hi, ajieh pen leihoi aumsih hi. Tualeh khen khat ling lah ah atu ua, alingte toh ahing poukhawm ua, a deepmangta hi. Khumin khenkhat leihoi ah atu ua, ahing pou ua, a le za in agata hi.” Tami agen kawm in, “Zaah nading bil neite’n zata uhen” achi hi. Tuamin anuazuite’n tami gentena thu bang china ahiei chia a doh uleh Aman “Nouhaw kungah Pasian gamthu kiseelgute theisah in na um uhi; hinanleh midangte kunga gentena kagen ahi, tuachia mu napi a amulou nading uleh za napia atheilou nading un, Gentethu pen tami ahi: Haichi ahileh Pasian thu ahi. Lampi dungate ahileh, athu za nan uleh gingtalou a, hundam a aumlou nading ua tuami thu khu a lungsim uapat a dawi in alahpiehte ahi uhi. Tualeh suongsilei lah a tute khu thu azaah chieng un kipahtah in apom ua, tamten bul-leh-baal aneisih ua, tomkhat agingta ua, solna atung ua atun chieng in apuata uhi. Ling lah a tute ahileh thu kigen za te ahi ua hinanleh, leitung hinna, hausatna leh noptatna in a deepmang a aga piching sih hi. Tualeh lei hoi a tute pen ahileh, thu za a, lungsim hoitah leh za umtah a pomdet a thuohhaatna toh ga suongte ahi uhi.
