John 1:45–51
Philip in Nathanael amu a, tualeh akungah, “Akhantan Mousi in danbu a anagel, tualeh guolneiten zong anagelh uh, Nazareth Jesu, Joseph tapa khu kamuta uhi,” achi hi . Nathanael in akungah, “Nazareth khuo ah silhoi apiengthei amah?” achi hi. Philip in akungah, “Hingpei inlen, hing en in” achi hi. Jesu’n Nathanael amalam zuon a hingpei amubep in atungtaang thu hichin agen hi: “En un, Israel mi tahtah zuou ngailoupa ahi,” achi hi. Nathanael in akungah, “Bang nahing chi thei amah?” achileh, Jesu’n akungah “Philip in ahing hat masang a, theipikung nuoia na umlaitah a kang mu nahita hi,” chin adawng hi. Nathanael in akungah, “Rabbi, Pasian Tapa! Israelte kumpipa nahi” achita hi. Jesu’n akungah, “Theipi kung nuoi ah kahing mu hi kachi jieh a nahing gintaat amah? Tamte sanga thupizaw sil munalai ding nahi,” chin adawng hi. Khumin akungah, “Thu dihtah kahing hil nahi, van kihong namu dinga, tualeh Pasian vansawlsiengte Mihing Tapa tunga kal tou leh kumsuh namu ding hi,” achi hi.
