Matthew 22:1-14
Kitenna annzalui gentena
Tualeh Jesu’n gentena thu toh akung uah thu agen kia a, “Vangam pen a tapa dinga kitenna annzalui bawl leengpa khat toh gente thei ahi. Tualeh aman annzaluina a hing haw dingte haan ding in asuohte asawl a, hinanleh amaute ahing peisih uhi. Tualeh aman akichielte kungah, ‘Ngai un, ka bawngtalte leh ka bawngnou thaute ka that jouta a, kitenna annzalui siim dingin hingpei ta un’, chia gen dingin asuohte asawlta hi. Hinanleh amauten athusim sih ua, khenkhatte lou akikuon ua, khenkhatten a summeet bawlna lam uah ataisan ua, tualeh adangten asuohte aman ua, abawlsie ua, athatta uhi. Leengpa alungthah a, tuolthatte mangthai sahding leh a khopite uh haaltum dingin agaalkapte asawlta hi. Tuajouin, aman asilate kungah, kitenna annzalui mansa ahita a, hinanleh ka chielte ane ding a kilawm ahinon sih uhi. Tuajieh in, lamkathuomte ah pei unlen, namu tapou uh kitenna annzalui iimding in hing chielta un,’ achita hi. Tualeh asilate khopi sungah apei ua, amu jousie uh hoita leh, hoita sihleh, ahaankhawm ua, tuachin kitenna huong sungah chielte adimta uhi. Kiteenna pawi hing siimte en dinga leengpa ahing luut chieng in, kiteenna puon sillou pasal khat amuta hi. Tualeh aman akungah, ‘Lawm aw, kiteenna puon sillou a bang hing chi luut na hiei?’ achita hi. Tualeh aman agen ding athei sih hi. Tuajouin, leengpan asuohte kungah, ‘Akhut akeeng hen unlen polam mielah pai un, tuanah kap-le- hagawi in aum ding hi,’ achita hi. Ajiehpen chielte tampi ahi ua, hinanleh teelte tawmnoukhat ahi,” achi hi.
