Matthew 20: 1-16
Leengga huon a naseemte gentena
Vangam pen inn neipa khat zingmawng a aleengga huon a naseem agoi dingte sui a kuonkhie toh kibang ahi. Aman naseem dingte toh nikhat a dangka peh khat law dinga akithukim nua un, a leengga huon ah naseem dingin asawlta hi. Tualeh vaihaamsang hun in midang van zuana mun a mawhdinte a pei kawm in amu a, tualeh akung uah: “Nou zong leengga huonah va kuonta un, akilawm ja ka hingpe ding hi,” achi hi. Tuachin amaute akuonta uhi. Sunkim leh nitah lam in apeikia a, achielkhawm kiata hi. Tualeh nitah lam in akuon kia a, mi dang na seemlou a um amu chiengin akung uah: “Bangdinga nitum donga na seemlou a tana ding nahi uoi?” achi hi. Amau ten akungah:“Ajiehpen, koute koi ma’n ahing chiel sih hi,”achi uhi. Aman akung uah: “Nou zong leengga huon ah va kuonta un,” achi hi. Tualeh nitah chiengin, leengga huon neipa’n a sumkeempa kungah: “Na seemte haan inlen, anukhiate apat in akuon masate dongin, asumlawsate uh peta’n,” achi hi. Nitah lama naseemte ahing pei ua, dangka pehkhat chiet akisaanta u hi. Akuon masate ahing pei ua, tamsaan tuom dingin akingaituo ua, hinanleh amauten zong dangka pehkhat ma asaang veve uhi. Sum anga jou un, leengga huon neipa tung ah aphun ua, amauten, anukhiate’n naikhat sung maimai asem ua, “Kou nisa thuoh a khosa kaia ni tum donga semte toh nahing kibangsah hi,” achi uhi. Aman alah ua pasal khat kungah: “Lawm aw, na tungah ka gamtakhiel sih hi, dangka pehkhat lawdinga kithukim hilou imah? Na thaman kilah inlen, kipei ta’n, nang ka hingpieh bangin anukhiate zong ka penuom hi. Ka neisate kathu a ka kibawl ding hilou amah?” Ahilouleh ka phat jieh a thangsie na mah?” chin adawngta hi. Tua mabangin, anukhiapente amasapen in apang ding ua, amasate anukhia pen in apang ding uhi.”
