Matthew 14:22–36
Jesu Tuipi tunga keenga avaahna
Tuajouin, mipite akikhensah sungin ama pei masanga gaalkhat lam a kuong a mapei dingin, nuazuite asawlta hi. Mipite asawl nua in thu ngen dingin muoltung ah apei touta hi, tuachin nitah lam ahita a, tuanah amatangin aum hi. Hinanleh gunkuong pen tui kimlaitah ah auma, huipi alaan jieh in, tui kiilin kuong khu anawhta hi. Phalvah kuon in akung lam uh juon in akeeng in tui tungah ahingpei hi. Nuazuiten ama tui tunga keenga hing pei amu un thadam hiva chin zau in akikouta uhi. Hinanleh Jesu’n ahoupi a, “Lungmuongtah in um un, keima kahi, zausih un,” achi hi. Tualeh Peter in ahoupi a: “Topa, nang nahi leh tuitunga nang kunga hingpei dingin thu hing pien,” achi hi. Aman Peter kungah: “Hing pei in,” achi hi. Peter khu kuong aki pat in akum a Jesu kung lam juonin tui tunga avaahta hi. Hinanleh huipi laangte amutah in azauta hi. Tumsuh dinga akisahtah in, “Topa hing hun in,”chin akikouta hi. Jesu’n thakhat in ajam a, atu a, akungah “Nang ginna tawmpa aw, bangdinga lung himaw na hiei?” achi hi. Khumin kuong sunga atuontah un hui khu asipta hi. Tualeh kuong sung a umten “PasianTapa tahtah ahina hi,” chin abeta uhi.
Jesu’n Genesaret a china adamsahna
Gaallang khat a agaalkaitah un, Gennesaret gam atungta hi. Khumi muna miten athei chieng un, tua gamkuol sungah thangkou asawl ua, achina jousie ahing pui ua, tualeh apuonmong beh atham thei nading un angen ua, tuachin atham jousie adam chietta uhi.
