JOHN 20: 1-2, 11-18
Jesu thawna
Nipi kaal khat sunga ni masa ni zingmawng khovah masangin, Mari Magdalene haan ah ahaw a, tuachin haan daal suong khu haan khuuh apat a lahkhietsa in amu hi. Tualeh amanu ataai a, Simon Peter leh nuazui dangkhat, Jesu’n a-itpa kungah avapei a, akung uah, “Haan khuuh akipat in Topa luong alamangta uhi, tualeh heia akoi uh adiei katheisih uhi,” avachi hi.
Jesu Mari kunga akilahna
Hinanleh, Mari pen haankhuuh gei ah akap a, a kaa kawm in, haan khuuh sung a en hi. Tualeh vansawlsieng ni puon vaam sil, Jesu luong kisielna a tou amu a, khat alulam ah atou a, khat akeeng lamah atou hi. Amauten akungah, “Numeinu aw, bangdinga kap nahiei?” achi uhi. Amanun akung uah, “Ka mangpa alamang ua tualeh heia akoi uh ahiei chi katheilou jieh in,” achi hi. Tami thu gen a, akinuahei leh Jesu dinglai amu a, hinanleh aman Jesu ahilam atheisih hi. Jesu’n akungah, “Numei, bang dinga kap nahiei? Koi ahiei na sui?” achi hi. Huon bawlpa hiva achi jieh in akungah “Pu aw, nang na laahkhiet ahileh na koina hing hil in, tuachin ken ka lakhe ding hi,” achi hi. Jesu’n akungah, “Mari” achia, tuachin amanu akihei a, akungah Hebru haam in, “Rabboni!” (tuapen Siepa china ahi) achi hi. Jesu’n akungah, “Hing tham nai sin, Pa kunga peitou nailou kahi, hinanleh ka unaute kungah vapei inlen, tuachin akung uah, ka Pa leh noute Pa, ka Pasian leh noute Pasian kunga peitou ding kahita hi,” achi hi. Mari Magdalene apeia nua zuite kungah,“Topa kamuta hi,” tualeh akunga athugenteng nuazuite kungah agenta hi.
