Matthew 12:38-42
Chiemtena kihil nuomlou
Tua laitah in Laigielte leh Phari saite lah a khenkhat ahing pei ua, akungah, “Siepa aw, nang kung akipat in chiemtena ka munuom uhi,” achi uhi. Hinanleh aman akung uah: “Khang giloute leh angkawm haatten chiemtena asui uhi, hinanleh guolnei Jonah chiemtena loungaal chiemtena dang amaute akipesih ding hi. Jonah khu suunthum leh zaanthum ngapi gilpi sung a aum mabangin, Mihing Tapa zong suunthum leh zaanthum leigil sung ah aum ding hi. Nineveh khuo a mite thukhen hun chiengin, tulai khangthate toh ading ding ua, amawpai ding uhi. Ajiehpen Jonah Pasian thugen jieh in akisiata uhi, ngai in Jonah sanga thupijaw khat tanah aum hi. Simlam leengnu thukhen hunchieng in tulai khangthate kungah ading dinga, amawpai ding hi. Solomon pilna ngaikhe dingin ahing kuon hi. Ngai un, Solomon saanga thupijaw khat tanah aumta hi.
