Matthew 13:24-43
Buheem gentena
Gentena dang akung uah agenkia a: “Vangam pen mikhat alou a haichi hoi thepa toh akigentethei hi. Hinanleh a iimutkaal in agaalpa ahing kuon a; bu lah ah buheem athe a, apeita hi. Khumin, bu ahingpou a, ahing vuita hi. Tualeh buheem zong ahing dawhta hi. Khumin inntehpa suohte ahing pei ua, akungah: “Pu aw, lou laiah buchihoi thelou na mah? Buheemte heia hing pieng ahiei?” achita uhi. Aman akung uah: “Tua pen i gaalpa bawl hi” achi hi. Asuohten akungah: “Ahileh vabawkhiet ding na chisih amah?” achi uhi. Aman “Hilou e, buheemte na lahkhawmna lam uah butahte botkhawm khava uteh, 30 bu lah dongin poukhawm uleh bu aat hun chiengin bu aatte kungah: “Buheem lakhawm masaphot unlen haal dingin lomkaan un; bu pen ka bu innah sung un, kachi ding hi,” achi hi.
Annkamtang gentena
Gentena dang khat akung uah agenkia a: “Van gam khu annkam tang, min aloulaia athe bang ahi. Tuapen haichi lah a neupen ahi; hinanleh ahing pou chiengin haichi dang saangin alienpen a, singkung ahing hita hi, tualeh tungleeng vate ahing leeng ua, abajaam ah agieh uhi,” achi hi.
Tol gentena
Gentena dang khat akung uah agenkia a: “Van gam khu numei khat in tol ala a tangbuong law thum dim lah a ajeelsieng masangsie a aphum bang ahi”. Tamteng Jesu’n gente thu in mipi lah ah agen hi; gentena loungal thu dang agen ngaisih hi. Guolnei in: “Gente thugenna in ka kam ka kaah ding a, leitung siemchiil akipat a sil kiphuol ka gendoh ding hi,” chia agensate ataangtun nading ahi. Tuajouin, mipite anuasie a, inn ah aluut a, khumin anuazuite akungah ahing pei ua, “Lou a buheem gentena thute hing hil chien in,” achi uhi. Tualeh Aman adawnga: “Haichi hoi thepa khu Mihing Tapa ahia, lou pen leitung ahi; tualeh haichi hoite pen gamtat hoite ahi ua, buheemte ahileh migiloute ahi uhi. Buheem the khu dawi ahia, bu lah hun khu leitung bei hun ahi, tualeh bu aat dingte pen vansawlsiengte ahi uhi. Buheemte pen akhop ua, meia ahaal mabang un leitung khangte abeiding hi. Mihing Tapa’n vansawlsiengte asawl dinga, agam akipat khelna bawlte leh sietna bawlte akhumding ua; meikhuuh laiah asepding uhi. Tuanah kaa-le-haagawina aum ding hi. Tua hun chiengin midihtatte apa u gam ah ni bangin ataangta ding uhi. Koi hinanleh bil nei jousien kijaahta un.”
